ރިކޯޑް ދަމަހައްޓައި އެސްޓީއޯގެ ހިއްސާއަކަށް މި އަހަރުވެސް 80 ރުފިޔާ ބަހަން ފާސްކޮށްފި

ސަރުކާރުގެ މައި ވިޔަފާރި ކުންފުނި، އެސްޓީއޯގެ މިދިޔަ އަހަރު ލިބުނު ފައިދާ އިން ހިއްސާ އަކަށް 80 ރުފިޔާ ބަހަން ނިންމައިފި އެވެ.

ނަސަންދުރާގައި މިރޭ ބޭއްވި ކުންފުނީގެ އަހަރީ އާންމު ޖަލްސާގައި އެ އަދަދު ފާސްވީ ޖަލްސާގައި ބައިވެރިވި މީހުންގެ 99.9 ޕަސެންޓް ވޯޓުންނެވެ. މިރޭގެ ޖަލްސާގައި އެސްޓީއޯގެ ހިއްސާދާރުންގެ ތެރެއިން 229 ހިއްސާދާރަކު ބައިވެރިވި އެވެ.

މިދިޔަ އަހަރުގެ ފައިދާ އިން ހިއްސާއަކަށް 80 ރުފިޔާ ބަހަން ފާސްކުރި އިރު، 2023 ވަނަ އަހަރުވެސް ބަހަން ނިންމީ މި އަދަދެވެ. މިއީ ފާއިތުވި 11 އަހަރުގެ ތެރޭގައި ވެސް އެ ކުންފުނިން ހިއްސާއަކަށް ބަހަން ނިންމި އެންމެ ބޮޑު އަދަދެވެ.

އެސްޓީއޯ އަށް މިދިޔަ އަހަރު އާމްދަނީގެ ގޮތުގައި ލިބުނީ 15 ބިލިއަން ރުފިޔާ އެވެ. އެއީ އޭގެ ކުރީ އަހަރު ލިބުނު އާމްދަނީއާ އަޅާބަލާއިރު ހަ ޕަސެންޓް މަދު އަދަދެކެވެ.

އާމްދަނީގެ އިތުރުން މިދިޔަ އަހަރު ފައިދާގެ ގޮތުގައި އެސްޓީއޯއަށް ލިބުނު އަދަދު ވެސް އޭގެ ކުރީ އަހަރާ އަޅާބަލާއިރު ވަނީ 12 ޕަސެންޓް ދަށްވެފަ އެވެ. މިދިޔަ އަހަރު ފައިދާގެ ގޮތުގައި އެސްޓީއޯއަށް ލިބުނީ 2.4 ބިލިއަން ރުފިޔާއެވެ.

އަދި ޓެކުހަށް ކެނޑުމަށްފަހު ސާފު ފައިދާއަށް މިދިޔަ އަހަރު ލިބުނީ 717 މިލިއަން ރުފިޔާއެވެ.