ވީއައިއޭގައި މާރާމާރީ ހިންގި މައްސަލައިގައި ދެ ބިދޭސީއަކު ހައްޔަރުކޮށްފި 

ވެލާނާ އިންޓަނޭޝަނަލް އެއާޕޯޓު (ވީއައިއޭ) ގައި މާރާމާރީ ހިންގި މައްސަލައިގައި ސްރީ ލަންކާގެ ދެ މީހަކު ހައްޔަރުކޮށްފިއެވެ.

އެ މައްސަލައިގައި ހައްޔަރުކޮށްފައިވަނީ، ލަންކާއަށް ނިސްބަތްވާ ޕްރިޔަންތަ ސިލްވަ ދެވަނިއްތިގެ (46އ) އާއި ތިލަކް ސޮމަޗަންޑްރަ މައްޑެތަލަށެ (43އ) އެވެ.

އެ ދެ މީހުންގެ ބަންދާ މެދު ގޮތެއް ނިންމުމަށް އިއްޔެ ކުރިމިނަލް ކޯޓަށް ހާޒިރުކުރުމުން، ކޯޓުން ވަނީ އެ މީހުން 15 ދުވަހުގެ މުއްދަތަކަށް ބަންދުގައި ބެހެއްޓުމަށް އަމުރުކޮށްފައެވެ.

ކުރިމިނަލް ކޯޓުގެ ބަންދު އަމުރުގައިވާ ގޮތުން އެއާޕޯޓުގައި އެ ދެމީހުން މާރާމާރީ ހިންގި އިރު، އެތަނުގައި ގިނަ އަދަދެއްގެ އާންމުން ވެސް އެއްވެފައި ތިއްބެވެ.