”އެމްޑަބްލިޔުއެސްސީ ރޯދަ ސުފުރާ“ މިއަހަރުވެސް ކުރިއަށް  

މާލޭ ވޯޓާ އެންޑް ސުވަރޭޖް ކޮމްޕެނީ (އެމްޑަބްލިޔުއެސްސީ) އިން އިޖުތިމާއީ ޒިންމާގެ ދަށުން ރަމަޟާން މަހަށް ހާއްސަކޮށްގެން ކުރިއަށްގެންދާ ”އެމްޑަބްލިޔުއެސްސީ ރޯދަ ސުފުރާ“ މިއަހަރުވެސް ރަމަޟާން މަހުގެ އެއްވަނަ ދުވަހުން ފެށިގެން ކުރިއަށްގެންދާ ކަމަށް އެ ކުންފުނިން ބުނެފިއެވެ.

އެމްޑަބްލިޔުއެސްސީން ބުނީ މިދިޔަ ރަމަޟާން މަހު އެ ޕްރޮގްރާމަށް އާންމުންގެ ފަރާތުން ލިބުނު ބޮޑު ތަރުހީބާއި އެއްބާރުލުމާ ގުޅިގެން، މިއަހަރުގެ ރަމަޟާން މަހުވެސް މި މާތް މަގުސަދުގައި އެ ހަރަކާތް މުޅި މަސްދުވަހަށް ބަހާލައިގެން ކުރިއަށް ގެންދިއުމަށް ހަމަޖެހިފައިވާ ކަމަށެވެ.

”އެމްޑަބްލިޔުއެސްސީ ރޯދަ ސުފުރާ 1447“ ގެ ދަށުން ކޮންމެ ދުވަހަކުވެސް ރޯދަވީއްލުމަށް ބޭނުންވާ ”އިފްތާރް މީލް ޕެކް“ ބެހުމުގެ މަސައްކަތް ކުރިއަށްދާނެ ކަމަށާއި މިއީ ރަމަޟާން މަހުގެ މަތިވެރި ރޫހާ އެއްގޮތަށް، އެކަކު އަނެކަކަށް އެހީތެރިވެ، އެކުވެރިކަމާއި އޯގާތެރިކަން އާލާކުރުމަށް ކުރިއަށްގެންދާ ހަރަކާތެއް ކަމަށް އެމްޑަބްލިޔުއެސްސީން ބުންޏެވެ.

އޭގެ އިތުރުން، މިއީ ޒަމާނުއްސުރެ ދިވެހިންގެ މެދުގައި އޮންނަ އެއްބައެއްވަންތަކަމާއި، ބަދަހި ގުޅުން ދެމެހެއްޓުމަށާއި، އިޖުތިމާއީ ރޫހު ވަރުގަދަކުރުމަށް އެ ކުންފުނިން ކުރާ މުހިންމު މަސައްކަތެއްކަން އެމްޑަބްލިޔުއެސްސީން ފާހަގަކުރެއެވެ.

”އިފްތާރް މީލް ޕެކް“ ބެހުމުގެ ހަރަކާތް ކުރިއަށްދާނީ ފެން ބިލްޑިންގެ މައި ދޮރުމަތީގައި އެކަމަށް ހާއްސަކޮށް ތައްޔާރުކޮށްފައިވާ ޓެންޓުގައެވެ. އެ ޕްރޮގްރާމުގައި ބައިވެރިވެ، ރޯދަވީއްލުމަށް ބޭނުންވާ ތަކެތި ހަދިޔާކުރުމުގެ ފުރުސަތު އެ ކުންފުނީގެ މުވައްޒަފުންނަށާއި އާންމު ރައްޔިތުންނަށް ވަނީ ހުޅުވާލައިފައެވެ.

އެމްޑަބްލިޔުއެސްސީން ބުނީ ގޭގައި ތައްޔާރުކުރާ ކާބޯތަކެތި ކޮންމެ ދުވަހަކު ހަވީރު 4:30 އިން 5:45 އާ ދެމެދު އެ ޓެންޓަށް ގެންދެވޭނެ ކަމަށާއި ސިއްހީ ރައްކާތެރިކަމަށް ބަލައި، ހަދިޔާކުރާ ތަކެތި ހުންނަންވާނީ ފޮއިލް ކޮންޓޭނަރުގައި ރަނގަޅަށް ބަންދުކޮށްފައި ކަމަށެވެ.

އެ ހަރަކާތަކީ ފެނާއި ނަރުދަމާގެ ހިދުމަތް ފޯރުކޮށްދިނުމުގެ އިތުރުން، މުޖުތަމައަށް ފައިދާހުރި ކަންކަން ކުރުމުގައި އެމްޑަބްލިޔުއެސްސީން ދޭ ސަމާލުކަމާއި، އިޖުތިމާއީ ކަންކަމުގައި އެ ކުންފުނިން އަދާކުރާ މުހިންމު ދައުރު ރަމްޒުކޮށްދޭ ކަމެއް ކަމަށް އެ ކުންފުނިން ބުންޏެވެ.