ބެއިރޫތުގެ ދެކުނު ސަރަހައްދުތަކުން މީހުން ހުސްކުރުމަށް އަމުރުކޮށްފި

ބެއިރޫތުގެ ދެކުނު ސަރަހައްދުތަކުން މީހުން ހުސްކުރުމަށް އިސްރާއީލުން ބުރާސްފަތި ދުވަހު އަމުރުކޮށްފިއެވެ.

އިސްރާއީލުން ބައިރޫތުގެ ދެކުނު ސަރަހައްދުތަކާއި ހިޒްބުﷲގެ ކޮންޓްރޯލް އޮންނަ ސަރަހައްދުތަކުން މީހުން ހުސްކުރުމަށް ބުރާސްފަތި ދުވަހު އިންޒާރު ދިނުމާ ގުޅިގެން، ވެރިރަށުގެ ”ޟާހިޔާ“ ސަރަހައްދުން ގިނަ ބަޔަކު ވަނީ ފައިބަން ފަށާފައެވެ.

އީރާނުގެ ތާއީދު އޮންނަ ހިޒްބުﷲއާ ދެކޮޅަށް އިސްރާއީލުން ކުރިއަށްގެންދާ ހަމަލާތައް އިތުރަށް ވަރުގަދަވާނެ ކަމުގެ އިޝާރާތެއް ކުރަމުން، އިސްރާއީލު ސިފައިންގެ ތަރުޖަމާނު ވަނީ ދެކުނު ސަރަހައްދުގެ ރައްޔިތުން އިރުމައްޗަށާއި އުތުރަށް ދިއުމަށް އަންގާފައެވެ. އަދި ވެރިރަށުގެ ބޮޑު ހަތަރު އަވަށެއް ހިމެނޭ ގޮތަށް، މީހުން ހުސްކުރަންޖެހޭ ސަރަހައްދުތައް ބަޔާންކޮށް އޭނާ ވަނީ ޗާޓެއް ވެސް އާންމުކޮށްފައެވެ.

މިދިޔަ ހޯމަ ދުވަހު ހިޒްބުﷲ އިން ހަމަލާތައް ފެށުމާއެކު، މެދުއިރުމަތީގެ ހަނގުރާމައިގެ ތެރެއަށް ލުބުނާން ވަނީ ރަސްމީކޮށް ވަދެފައެވެ. މީގެ ރައްދުގައި އިސްރާއީލުން ވަނީ ބައިރޫތުގެ ދެކުނު ސަރަހައްދުތަކަށާއި، ލުބުނާނުގެ ދެކުނާއި އިރުމަތީގެ ސަރަހައްދުތަކަށް އަމާޒުކޮށް ވަރުގަދަ ވައިގެ ހަމަލާތަކެއް ދީފައެވެ.

އިސްރާއީލު އަސްކަރިއްޔާގެ ތަރުޖަމާނު އަވީޗޭ އަދްރާއީ ސޯޝަލްމީޑިއާގައި ކުރި ޕޯސްޓެއްގައި ބުނެފައިވަނީ، ”ތިޔަބައިމީހުންގެ ފުރާނަ ސަލާމަތްކުރުމަށްޓަކައި، ވަގުތުން ގެދޮރު ދޫކޮށް ނުކުންނާށެވެ.“ އަދި ދެކުނާ ދިމާލަށް ކުރާ ދަތުރުތަކަކީ ފުރާނައަށް ނުރައްކާވާނެ ދަތުރުތަކެއްކަމަށްބުނެ އޭނާ އިންޒާރު ދީފައިވެއެވެ.

ބައެއް ވީޑީއޯތަކުން ފެންނަ ގޮތުގައި، މީހުން ފައިމަގުގައާއި އުޅަނދުފަހަރުގައި ސަރަހައްދު ދޫކޮށް ދިއުމުގެ ސަބަބުން މަގުތައް ވަނީ ވަރަށް ބޮޑަށް ތޮއްޖެހިފައެވެ. މީގެއިތުރުން، ރައްޔިތުން އެ ސަރަހައްދުތަކުން ބޭރުވުމަށް ބާރުއެޅުމުގެ ގޮތުން ދެކުނު ސަރަހައްދުތަކުގައި އިންޒާރުގެ ބަޑީގެ އަޑުތައް އިވެމުންދިޔައެވެ.

އިސްރާއީލުން ބުރާސްފަތި ދުވަހު ދިން އިންޒާރާ ގުޅިގެން އެގައުމުގެ ހަރުކަށި ފިކުރުގެ ވަޒީރަކު ވަނީ އެ ސަރަހައްދު ދާދި އަވަހަށް ގައްޒާގެ ބައެއް ސަރަހައްދުތަކާ އެއްގޮތަށް ހަދާނެކަމަށް ބުނެފައެވެ.

ބައިރޫތަކީ ލުބުނާނުގެ ވެރިރަށުގެ އިތުރުން އެ ގައުމުގެ އެންމެ ބޮޑު ސިޓީއެވެ. 2025 ވަނަ އަހަރުގެ ތަފާސްހިސާބުތަކަށް ބަލާއިރު، ގްރޭޓަރ ބައިރޫތުގެ އާބާދީ އަކީ 2.4 މިލިއަނެވެ. މިއީ މުޅި ލުބުނާނުގެ ޖުމްލަ އާބާދީގެ ގާތްގަނޑަކަށް ދެބައިކުޅަ އެއްބަޔާ ގާތްކުރާ މިންވަރެކެވެ.