މަޝްހޫރު ޕޮޕް ބޭންޑް، ބީޓީއެސްގެ މެންބަރު ކިމް ތޭ-ހްޔޮންގް ނުވަތަ މަޝްހޫރު ނަމުން ނަމަ ވީ، އޭނާގެ އެއް ކަންފަތުގެ އަޑުއިވުމުގެ ނުކުޅެދުންތެރިކަމަށް ފަރުވާ ހޯދަމުންދާ ކަމަށް ބުނެފި އެވެ.
އިއްޔެ ކުރިއަށް ގެންދިޔަ ލައިވްސްޓްރީމެއްގެ ތެރެއިން އުމުރުން 30 އަހަރުގެ ވީ، އެކަން އިއުލާންކޮށްފައި މިވަނީ ބީޓީއެސް އިން ފަށާފައިވާ ދުނިޔޭގެ ޓުއާގެ މެދުތެރެއިންނެވެ.
ވީ ބުނީ މި މައްސަލަ އޭނާއަށް ދިމާވެގެން އުޅޭތާ ދެ އަހަރާއި ބައިވަރު ވެއްޖެ ކަމަށާއި މިއީ ބޭންޑުގެ ސަޕޯޓަރުންނަށް އޭނާ މިކަން ހާމަކުރި ފުރަތަމަ ފަހަރު ކަމަށެވެ. އަދި ކަންފަތުގެ އަޑުއިވުން އިތުރަށް ގޯސްވީ އަސްކަރީ ހިދުމަތުގައި އުޅުނު ދުވަސްވަރު ކަމަށްވެސް އޭނާ ބުންޏެވެ.
”މަގޭ ވާތު ކަންފަތުގެ އަޑުއިވުން 100 ޕަސެންޓުގައި ހުރި އިރު، ކަނާތު ކަންފަތަށް އަޑުއިވެނީ އެންމެ 30 ޕަސެންޓަށް،“ އެކަމަށް ފަރުވާ ހޯދަމުންދާކަން ފާހަގަކޮށް ވީ ބުންޏެވެ.
ބީޓީއެސް އިން މިހާރު ކުރިއަށް ގެންދާ ޓުއާއަކީ ކޮންމެހެން އަދާކުރަންޖެހޭ އަސްކަރީ ހިދުމަތަށްފަހު ބޭންޑުގެ ހަތް މެންބަރުން އެކީގައި އަހަރުތަކެއް ފަހުން ބާއްވާ ފުރަތަމަ ދުނިޔޭގެ ޓުއާ އެވެ.
ދެކުނު ކޮރެއާގެ އަސްކަރިއްޔާއަށް ހިދުމަތް ކުރުމަކީ އެ ގައުމުގެ ކޮންމެ ފިރިހެނެއްގެ މައްޗަށް ގާނޫނީ ގޮތުން ލާޒިމް ކަމަކަށް ވީއިރު ވީ އަސްކަރީ ހިދުމަތާ ގުޅުނީ 2023 ވަނަ އަހަރު އެވެ. ހިދުމަތުން ވަކިވީ 2025 ވަނަ އަހަރުގެ ޖޫން މަހު އެވެ.
