ސިންގަޕޫރުގައި މީހުން ވިހާ ރޭޓު ރެކޯޑް މިންވަރަކަށް ދަށްވަމުންދާތީ, އެކަމާ ދެކޮޅަށް ކުރަމުންދާ މަސައްކަތުގެ ތެރެއިން އެ ގައުމުގެ ސިވިލް ސާވަންޓުންނަށް ހާއްސަކޮށްގެން ބައިވެރިން ހޯދައިދޭ ހިދުމަތެއް އެ ގައުމުގެ ސަރުކާރުން ތައާރަފުކޮށްފި އެވެ.
އުމުރުން 21 އަހަރާއި 35 އަހަރާ ދެމެދުގެ މީހުންނަށް ހާއްސަކޮށްގެން ސިންގަޕޫރުގެ ޓެކްނޮލޮޖީ އޭޖެންސީ, ގޮވްޓެކް އިން މި ހަފުތާގައި ތައާރަފުކުރި ”ފަސްޓްޑޭޓް“ އަކީ ލޯބިވެރިން ހޯދުމުގައި ”ތަފާތު ގޮތެއް“ ގެންގުޅޭ ހިދުމަތެކެވެ. އޭގައި ބައިވެރިން ގުޅުވައިދިނުމަށް ބޭނުންކުރަނީ ނޯބެލް އިނާމު ހޯދާފައިވާ އަލްގޮރިދަމެކެވެ.
އެ ހިދުމަތުގައި ބައިވެރިވާ މީހުން ސައިން-އިން ވާނީ ގައުމީ ޑިޖިޓަލް އައިޑެންޓިޓީ ނިޒާމު މެދުވެރިކޮށެވެ. އެއަށްފަހު އެ މީހަކު ޝައުގުވެރިވާ ކަންކަމާއި އާދަތަކާއި އަދި ގަބޫލުކުރާ އުސޫލުތަކާ ގުޅޭ ސާވޭއަކަށް ޖަވާބުދޭންޖެހެ އެވެ.
”ފަސްޓްޑޭޓް“ ގެ ވެބްސައިޓުގައި ފާހަގަކޮށްފައިވާ ގޮތުގައި، މި ޕްރޮގްރާމް ހިންގަނީ ’ގޭލް-ޝެޕްލީ ސްޓޭބަލް މެރިޖް‘ އަލްގޮރިދަމްގެ އެހީގައެވެ. އެ ހިސާބު އިލްމުގެ އޮނިގަނޑަކީ އެއްވަރެއްގެ ދެ ގްރޫޕެއްގެ މީހުން، އެ މީހުންގެ އިސްކަންދޭ ކަންކަމުގެ މައްޗަށް ބިނާކޮށް ޖޯޑުކޮށްދޭ ނިޒާމެކެވެ.
މި ޕައިލެޓް ޕްރޮޖެކްޓް ފަށާފައި މިވަނީ ސިންގަޕޫރުގެ ވިހާ ރޭޓު ތާރީހުގައި ވެސް ދަށަށް ނުދާ މިންވަރަކަށް ދަށަށް ގޮސްފައިވާ ދަނޑިވަޅެއްގައެވެ. އެގޮތުން 2025 ވަނަ އަހަރު އުފަންވި ކުދިންގެ އަދަދު ވަނީ 30،000 އަށްވުރެ ދަށްވެފަ އެވެ. މިއީ ވޭތުވެދިޔަ 60 އަހަރު ދުވަހުގެ ތެރޭގައި އެ އަދަދަށް ދަށަށްދިޔަ ފުރަތަމަ ފަހަރެވެ.
ސިންގަޕޫރުގައި އުމުރުން ދުވަސްވީ މީހުން ގިނަވަމުންދާއިރު މަރުވާ މީހުންގެ އަދަދު ދަނީ މެދުކެނޑުމެއްނެތި އިތުރުވަމުންނެވެ. އެގޮތުން 2025 ވަނަ އަހަރު މަރުވި މީހުންގެ އަދަދު ވަނީ ގާތްގަނޑަކަށް 26،500 އަށް އަރައިފަ އެވެ.
އާއިލާތަކަށް އެހީތެރިކަން އިތުރުކުރުމަށާއި ކައިވެނިކޮށްގެން ދަރިން ހޯދުމަށް ހިތްވަރު ދިނުމުގެ ގޮތުން، ބޮޑުވަޒީރު ލޯރެންސް ވޮންގް ވަނީ އޮގަސްޓް މަހު އާ ފިޔަވަޅުތަކެއް އިއުލާން ކުރައްވައިފަ އެވެ.
އޭގެ ތެރޭގައި ކޮންމެ ކުއްޖަކަށް 17 އަހަރު ފުރެންދެން، މާލީ އެހީގެ ގޮތުގައި ގާތްގަނޑަކަށް 70،000 ސިންގަޕޫރު ޑޮލަރު (54،000 އެމެރިކާ ޑޮލަރު؛ 41،000 އިނގިރޭސި ޕައުންޑް) ދިނުން ހިމެނެ އެވެ.
