މޮރޮކޯގެ ރަސްގެފާނު މުހައްމަދު ހަވަނަ، އެ ގައުމުގެ ބޮޑުވަޒީރުގެ މަގާމަށް އާބަން ޕްލޭނިން މިނިސްޓަރު ފާތިމާ ޒަހްރާ މަންސޫރީ އިއްޔެ އަންޔަންކުރައްވައިފި އެވެ.
މިއާއެކު، އުމުރުން 50 އަހަރުގެ ގާނޫނީ ވަކީލު މަންސޫރީ ވެގެންގޮސްފައިވަނީ މޮރޮކޯގައި އެ މަގާމު ފުރުއްވާ ފުރަތަމަ އަންހެން ބޭފުޅާއަށެވެ. އަދި އޭނާއަކީ ޓިއުނީޝިއާގެ ނަޖްލާ ބޫދިންއަށްފަހު އަރަބި ދުނިޔޭގައި ބޮޑުވަޒީރުކަން ކުރައްވާ ދެވަނަ އަންހެން ބޭފުޅާ
މޮރޮކޯގެ ގާނޫނުއަސާސީ ބުނާގޮތުން, ރަސްގެފާނު ބޮޑުވަޒީރުކަމަށް އައްޔަންކުރައްވަން ޖެހެނީ މަޖިލީހުގެ އެންމެ ގިނަ ގޮނޑި ކާމިޔާބުކުރާ ސިޔާސީ ޕާޓީގެ ބޭފުޅެކެވެ. އެގޮތުން އެ ގައުމުގައި ބޭއްވި ގާނޫނުހަދާ މަޖިލީހުގެ އިންތިހާބުގައި އެންމެ ގިނަ ވޯޓު ހޯދީ މަންސޫރީގެ އޮތެންޓިސިޓީ އެންޑް މޮޑާނިޓީ ޕާޓީ (ޕީއޭއެމް) އިންނެވެ. މިއީ އެ ޕާޓީ އުފެދުނު ފަހުން ލިބުނު ފުރަތަމަ ކާމިޔާބީއެވެ.
އޭގެ ހަތަރު ދުވަސް ފަހުން މޮރޮކޯގެ ޝާހީ ގަނޑުވަރުން އިއްޔެ ނެރުނު ބަޔާނެއްގައި ބުނީ, މަންސޫރީ އާ ސަރުކާރެއް އެކުލަވާލުމުގެ މަސައްކަތް ހަވާލުކުރައްވާފައިވާ ކަމަށެވެ.
ނަމަވެސް މޮރޮކޯގެ އިންތިހާބީ ނިޒާމު އޮންނަ ގޮތުން އެއްވެސް ޕާޓީއަކަށް އެކަނި އަގުލަބިއްޔަތު ހޯދުމަކީ ދަތި ކަމެކެވެ. އެހެންވެ މަންސޫރީ, ކުރިއަށް އޮތް ދުވަސްތަކުގައި ސަރުކާރެއް އެކުލަވާލުމަށްޓަކައި ކޯލިޝަނެއް ހައްދަވާނެ ކަމަށް ބެލެވެ އެވެ.
ރިޕޯޓްތައް ބުނާ ގޮތުން މަންސޫރީގެ ސަރުކާރުން 2030 ވަނަ އަހަރުގެ ފީފާ ވޯލްޑް ކަޕާ ގުޅުންހުރި ބިލިއަން ޑޮލަރުގެ އިންވެސްޓްމަންޓްތައް ކުރާނެ ކަމަށް ބެލެވެ އެވެ. އަދި އިންފްލޭޝަން ކޮންޓްރޯލް ކުރުމަށާއި މުސާރަ ބޮޑުކުރުމަށާއި ވަޒީފާގެ ފުރުސަތުތައް އުފެއްދުމަށް ވެފައިވާ ވައުދުތައް ފުއްދުމަށްވެސް މަސައްކަތް ކުރާނެ ކަމަށް ރިޕޯޓްތައް ބުނެ އެވެ.
ފްރާންސްގެ ޔުނިވާސިޓީ އޮފް މޮންޕެލިއޭ އިން ގާނޫނީ ދާއިރާއިން ދަސްވެނިވެ ވަޑައިގެންނެވި މަންސޫރީ ޕީއޭއެމްއާ ގުޅިވަޑައިގަތީ 2008 ވަނަ އަހަރު އެ ޕާޓީ އުފެދުނު ދުވަސްވަރު އެވެ. އެ ޕާޓީ އުފެއްދެވީ ރަސްގެފާނުގެ ކުޑައިރުގެ އެކުވެރިއެއް އަދި އަރިސް މުޝީރެއް ކަމަށްވާ ފުއާދު އަލީ އެލް ހިއްމާ އެވެ.
މަންސޫރީ ވަނީ 2024 ގައި އެ ޕާޓީގެ އިސް ލީޑަރުންގެ ތެރޭގައި ހިމެނިވަޑައިގެންފަ އެވެ. އޭނާ ވަނީ ދެ ފަހަރެއްގެ މަތިން މަރާކޭޝްގެ މޭޔަރުކަމާއި ގާނޫނުހަދާ މަޖިލީހުގެ މެންބަރުކަން ކުރައްވައިފަ އެވެ.
މަންސޫރީއަކީ ”މަރާކޭޝްގެ ޕާޝާ“ (އިސްވެރިޔާ) ގެ ނަމުން މަޝްހޫރުވި އަބްދުއްރަހުމާން އެލް މަންސޫރީގެ ދަރިކަނބަލުންނެވެ. އޭނާއަކީ ސަރަހައްދީ އިސް އޮފިޝަލެއްގެ އިތުރުން ޔުނައިޓެޑް އަރަބް އެމިރޭޓްސްއަށް މޮރޮކޯއިން ކަނޑައަޅާފައި ހުންނެވި ސަފީރެވެ. އަދި އޭނާއަކީ މަރާކޭޝްގެ ބާ އެސޯސިއޭޝަންގެ ވެރިޔާ އަދި ބޮޑު ބިންވެރިއެކެވެ.
