ހުރިހާ ތަކުލީފުތަކަކަށް އޮތް އެންމެ މަތިވެރި އަދި އެންމެ ފުރިހަމަ ފަރުވާއަކީ ގިނަގިނައިން މާތް ﷲ ހަދުމަކުރުން ކަމަށް މިއަދުގެ ހުކުރު ހުތުބާގައި ބުނެފި އެވެ.
”ގިނަގިނައިން ﷲ ހަނދުމަކުރުން“ މި މައުޟޫއުއަށް މިއަދު ދިން ހުކުރު ހުތުބާގައި ބުނީ, އަހަރެމެން މިއަދު ވޭތިކުރަމުންދަނީ ހާސްކަމާއި ނަފުސާނީ އެކި ގޮންޖެހުންތަކުން ފުރިފައިވާ ދުވަސްތަކެއް ކަމަށާއި ދިރިއުޅުމުގެ ދަތިތަކާއި ފިކުރުތަކުގެ ޝަކުވާނުކުރާ މީހަކު މަދު ކަމަށެވެ.
ހުތުބާގައި ބުނީ, މާތް ﷲ ހަނދުމަކުރުމަކީ ހިތްތަކުގެ ދިރުން ކަމަށާއި އެއީ އެކަލާނގެ މަތިވެރި ހަޒުރަތާ ކުއްތަންވުމަށް އޮތް އެންމެ ފަސޭހަ އަދި އެންމެ ކުރު މަގު ކަމަށެވެ. އަދި ޒިކުރުކުރުމުގެ ސަބަބުން އިންސާނާގެ ނަފުސަށް ހަމަޖެހުމާއި އުފާވެރިކަން ލިބި, ދިރިއުޅުމުގެ ހާސްކަމާއި ބުރަކަން ފިލައިދާ ކަމަށްވެސް ބުންޏެވެ.
އަދި ބުނީ, އެއީ މާތް ﷲގެ މަތިވެރިކަމާއި ހައިބަވަންތަކަމާއި ކާއިނާތުގައިވާ އެންމެހައި ނިއުމަތްތަކަކީ އެކަލާނގެ ދެއްވި ތަކެތިކަން ގަބޫލުކޮށް، އެކަލާނގެ މަދަދާއި ނަޞްރު އަބަދުވެސް އަހަރެމެންނާ އެކުގައި ވާކަން އިހުސާސްކޮށްދޭ ކަމެއް ކަމަށެވެ.
މާތް ﷲ ހަނދުމަކުރުން މައިގަނޑު ތިން ބަޔަކަށް ބެހިގެންވާކަން ފާހަގަކޮށް ހުތުބާގައި ބުނީ, ފުރަތަމައީ، ހިތުގެ އިހުލާސްތެރިކަމާއެކު ހަނދުމަކުރުން ކަމަށެވެ. އެއީ މާތް ﷲގެ ކުޅަދުންވަންތަކަމާއި މި ކައުނުގައިވާ އެކަލާނގެ މަތިވެރި އުފެއްދުންތަކާ މެދު ފުންކޮށް ފިކުރު ހިންގައި، ތަސައްވަރުކުރުމާއެކު ތިމާ ކުރާ ކޮންމެ ކަމެއް މާތް ﷲ ބައްލަވައިވޮޑިގެންވާކަން ދަނެ، އެކަލާނގެއަށް ބިރުވެތިވުމާއި ލޯބިވުމާއި ވަކީލުކުރުމުގެ ސިފަ ހިތުގައި ވަރުގަދަކުރުން ކަމަށެވެ.
ދެވަނައީ، ދުލުން ޒިކުރުކުރުންކަން ފާހަގަކޮށް ހުތުބާގައި ބުނީ, އެއީ މާތް ﷲގެ މަތިވެރިކަން ބަޔާންކޮށް، އެކަލާނގެއަށް ހަމްދާއި ސަނާގެ ކަލިމަތައް ދުލުން ކިޔައިއުޅުން ކަމަށެވެ. އޭގެ ތެރޭގައި ކީރިތި ގުރުއާން ކިޔެވުމާއި ތަސްބީހަކިޔުމާއި ފާފަފުއްސެވުމަށް އެދި ދުއާކުރުމުގެ އިތުރަށް، ކީރިތި ރަސޫލާގެ މައްޗަށް ސަލަވާތްކިޔެވުން ހިމެނޭ ކަމަށް ބުންޏެވެ.
ހުތުބާގައި ބުނީ, ތިންވަނައީ، އަމަލީ ގޮތުން ނުވަތަ ގުނަވަންތަކުގެ ޒަރީއާއިން މާތް ﷲ ހަނދުމަކުރުން ކަމަށެވެ. އެގޮތުން ފަރުޟު ފަސް ނަމާދު އަދާކުރުމާއި ރޯދަ ހިފުމާއި ޒަކާތް ދިނުމާއި ހައްޖާއި އުމްރާގެ އަޅުކަން ފުރިހަމަކުރުމަކީ މީގެ ތެރޭގައި ހިމެނޭ ކަންކަން ކަމަށާއި އެއާއެކު މައިންބަފައިންނަށް އޯގާތެރިވުމާއި މީސްތަކުންނަށް އެހީތެރިވެ ހެޔޮ ފޯރުވުމަކީ ވެސް އަމަލުން މާތް ﷲ ހަނދުމަކުރުމުގެ މަތިވެރި ނަމޫނާތަކެއް ކަމަށް ބުންޏެވެ.
ހުތުބާގައި އިތުރަށް ބުނީ, މާތް ﷲގެ މަތީން ހަނދުމަކުރުމަކީ ޝައިތާނާގެ ވަސްވާސްތަކާ ދުރުކޮށްދީ، ރަހުމާނުވަންތަ ރަސްކަލާނގެ ރުހިވޮޑިގަތުން ހޯދައިދޭ، މަތިވެރި އަޅުކަމެއް ކަމަށާއި އެއީ ހިތްތަކުން ހާސްކަމާއި މޮޅިވެރިކަން ފިލުވައިދީ، އުފާވެރިކަމާއި ހަމަޖެހުން ގެނެސްދޭ ކަމެއް ކަމަށެވެ.
އަދި ޒިކުރުކުރުމުގެ ސަބަބުން ހަށިގަނޑަށް ދިރުމާއި ބާރު ލިބި، މޫނުމަތީގެ އުޖާލާކަމާއި ހައިބަތު ފާޅުވާއިރު އެއީ މަރުވެފައިވާ ހިތްތަކަށް ދިރުންދީ، ގާފިލުކަމުގެ ނިދީން އިންސާނާ ހޭލައްވައިދޭ ހިތުގެ ކާނާ ކަމަށްވެސް ހުތުބާގައި ބުންޏެވެ.
ޒިކުރުކުރުމަކީ ހަމައެކަނި މިސްކިތުގައި އިނދެގެން ކުރާ ކަމެއް ނޫންކަން ފާހަގަކޮށް ހުތުބާގައި ބުނީ, ދިރިއުޅުމުގެ ކޮންމެ ހާލަތެއްގައި ވެސް ޒިކުރު ކުރެވިދާނެ ކަމަށެވެ. އެގޮތުން ހިނގާފައި ދާއިރު, ސަވާރީއެއްގައި ދަތުރުކުރާއިރު, އޮށޯވެ އޮންނަ އިރު, މަސައްކަތުގެ މައިދާނުގައި އުޅޭއިރުވެސް ޒިކުރު ކުރެވިދާނެ ކަމަށާއި ބާއްޖަވެރިކަމަށް އެދޭ މީހާގެ ދޫ އަބަދު ވެސް އޮންނާންޖެހޭނީ ﷲއަށް ޒިކުރުކުރުން މަތީގައި ކަމަށް ބުންޏެވެ.
