ރައީސް ޑރ. މުހައްމަދު މުއިއްޒުގެ މި ސަރުކާރުގެ ހަމައެކަނި އަމާޒަކީ ދޮގުހެދުމާއި އޮޅުވާލުމާއި މަކަރުހެދުން ކަމަށް ވިދާޅުވެ މި ސަރުކާރަށް އެމްޑީޕީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު ވަރަށް ބޮޑަށް ފާޑުވިދާޅުވެއްޖެ އެވެ.
އެމްޑީޕީގެ ކޮންގްރެސް ފެށުމަށް މާލެ ސިޓީ ކައުންސިލްގެ ގޯތިތެރޭގައި ބޭއްވި ޖަލްސާގައި ވާހަކަފުޅުދައްކަވަމުން ނަޝީދު ވިދާޅުވީ, އެމްޑީޕީގެ ކޮންގްރެސްގެ ކަންބޮޑުވުން ހުއްޓެނީ ރާއްޖޭގެ މާލިއްޔަތާއި އަދި އިގުތިސާދީ ކަންކަން މިއަދު ގެންދާނޭ ގޮތުގެ މިސްރާބެއް މި ސަރުކާރުގައި ނެތުމުން ކަމަށެވެ. އެގޮތުން މި ސަރުކާރުގެ ޑޮލަރުގެ ސިޔާސަތަކީ ފެއިލްވެފައިވާ ސިޔާސަތެއް ކަމަށާއި އެ ސިޔާސަތު ތަންފީޒެއްވެސް ނުކުރެވުނު ކަމަށް ވިދާޅުވި އެވެ.
”ބަތް ކައްކާ ކުޅުން, މީޒާނެއް ނެތް. ލާހޫރޭ އިގުތިސާދީ ސިޔާސަތުތަކެއް މި ދިވެހިރާއްޖެއަށް މި ގެންދަނީ ކަނު ބަނދެވިގެން ތިބޭ އަނދަވަޅަކަށް ވެއްޓުމަށް. އަޅުގަނޑުމެންނެއް މި ޕާޓީއެއް އެ މަގަށް މި ރާއްޖެ ދިއުމަކަށް ދުލެއް ނުކޮށްލެވޭނެ. އަޅުގަނޑުމެން ރައީސް މުޢިއްޒު ބަދަލުކުރާނަން. މި ދިވެހިރާއްޖޭގެ ރައްޔިތުންނަށް އަޅުގަނޑުމެން ހެޔޮ ވަރިކަމެއް ހޯދައިދޭނަން. މި ސަރުކާރު އަޅުގަނޑުމެން ބަދަލުކުރާނަން. ދިވެހި ރައްޔިތުންގެ ޑިމޮކްރެޓިކް ޕާޓީގެ ސަރުކާރެއް އިރާދަކުރެއްވިއްޔާ އަދެއް އުފެދިގެން އަންނާނެ. އަންނާނެ. ދޮގުހެދުމާއި، އޮޅުވާލުމާއި، މަކަރު ހެދުން. މިއީ މި ސަރުކާރުގެ ހަމައެކަނި އަމާޒު. ރާއްޖޭގެ ރައްޔިތުންނަށް ކަމެއް ކޮށްދިނުމުގެ ކުޑަ ޚިޔާލެއްވެސް އެ ބޭފުޅުންގެ ނެތް.“ ނަޝީދު ވިދާޅުވި އެވެ.
ދަރަނިތައް ދެއްކުމަށް މި ސަރުކާރުގެ އެއްވެސް ސިޔާސަތެއް ނެތްކަން ފާހަގަކުރައްވައި ނަޝީދު ވިދާޅުވީ, މި ސަރުކާރަށް ރާއްޖޭން ބޭރުން ގެނެވުނު ފައިސާއެއް ނެތްތަނުގައި ދަރަނިތައް ދައްކަނީ ”ރަށުގައި ހުރި ހުރިހާ ޑޮލަރެއް އެތަންމިތަނުން ނެގުނު ގޮތަކަށް ނަގައިގެން“ ކަމަށެވެ. އެކަމުގެ ސަބަބުން ދައުލަތުގެ ހަޒާނާއާއި ބޭންކުގައި ޑޮލަރެއް ނެތްއިރު, ޓީޓީތަކަށް ލާރި ނުދެއްކި, އިމްޕޯޓް މުދާ އަގުބޮޑުވެ, ތަކެތީގެ އަގު އުފުލި, ރައްޔިތުންނަށް ދަތިވެފައިވާ ކަމަށްވެސް ނަޝީދު ވިދާޅުވި އެވެ.
