މާލޭގައި ފުޅާދާއިރާއެއްގައި ބަނގުރަލުގެ ވިޔަފާރިކުރަމުން ދިޔަ ދެ މީހަކު ހައްޔަރުކޮށްފައިވާ ކަމަށް ފުލުހުން ބުނެފި އެވެ.
އެ މައްސަލައިގައި ފުލުހުްނ ހައްޔަރުކޮށްފައިވަނީ ޕެރުމަލް މަޔަވަން ނަމަކަށް ކިޔާ 41 އަހަރުގެ އިންޑިއާ މީހަކާއި ރިސްލިން ފަލީލް ނަމަކަށް ކިޔާ 35 އަހަރުގެ ސްރީ ލަންކާ މީހެކެވެ.
ފުލުހުން ބުނީ، އެ ދެ މީހުން ހައްޔަރުކޮށްފައިވަނީ ގަވާއިދާ ހިލާފަށް ބަނގުރާ ގެންގުޅެ، ވިޔަފާރިކޮށް އަދި ޑުރަގާއި ބަނގުރާ ބޭނުންކުރާ ކަމަށް ތުހުމަތުކުރެވޭ މައްސަލައާ ގުޅިގެން ކަމަށެވެ.
އެގޮތުން މި މަހުގެ އެއްވަނަ ދުވަހު ޑްރަގް އެންފޯސްމަންޓާއި ކައުންޓާ ނާކޮޓިކްސް އިންޓެލިޖެންސް ގުޅިގެން ހިންގި އޮޕަރޭޝަންގައި، އެ މީހުން ހައްޔަރުކޮށް މާލޭ ގެއެއް ބަލައިފާސްކުރުމުގެ ތެރެއިން، ބަނގުރާކަމަށް ބެލެވޭ އެއްޗެއްހުރި 500 އެމްއެލްގެ 1677 ފުޅި އާއި ބަނގުރާ ކަމަށް ބެލެވޭ އެއްޗެއްހުރި ފަސް ލީޓަރުގެ 23 ފުޅި އާއި ޑުރަގް ކަމަށް ބެލެވޭ އެއްޗެއް ހުރި ދެ ރަބަރު ޕެކެޓު ފެނިފައިވާ ކަމަށް ފުލުހުން ބުންޏެވެ.
500 އެމްއެލްގެ 1677 ފުޅިއަކީ ގާތްގަނޑަކަށް 69 ކޭހެވެ. އަދި ފަސް ލީޓަރުގެ 23 ފުޅިއަކީ ފަސް ކޭހެވެ. އެހެންކަމުން މި މައްސަލައިގައި ފުލުހުން ވަނީ ޖުމުލަ 74 ކޭހަށްވާ ބަނގުރާ އަތުލައިގެންފަ އެވެ.
ފުލުހުން އިތުރަށް ބުނީ، އެ މައްސަލައިގެ އިޖުރާއަތްތައް ފުރިހަމަކުރުމަށް ފަހު ދެ މީހުން ވެސް އިމިގްރޭޝަން ގާނޫނުގެ ދަށުން ފިޔަވަޅުއެޅުމަށް މޯލްޑިވްސް އިމިގްރޭޝަނާ ހަވާލުކޮށްފައިވާ ކަމަށެވެ.
