ކާއެއްޗެހި އޯޑަރުކުރުމަށްފަހު ތަކުރާރުކޮށް ފޭކް ސްލިޕް ފޮނުވަމުންދިޔަ މީހަކު ހައްޔަރުކޮށް, ބަންދަށް 15 ދުވަސް ޖަހައިފި އެވެ.
މަކަރާއި ހީލަތުގެ ތުހުމަތުގައި އެ މައްސަލައިގައި ހައްޔަރުކުރީ ގދ. ފަރެސްމާތޮޑާ/ އިރަމާގޭ, މުހައްމަދު ޖަދުއާން, 23އ އެވެ.
އޭނާ ބަންދުކުރުމަށް ކްރިމިނަލް ކޯޓުން އިއްޔެ ނެރުނު އަމުރުގައިވާ ގޮތުން ފޭކް ސްލިޕް ފޮނުވައިގެން އޯޑަރުކުރި ކާއެއްޗާ ހަވާލުވެފައިވަނީ ޖަދުއާނެވެ.
އަދި ތަކުރާރުކޮށް އޭނާ އެކަން ކޮށްފައިވާތީ, ކުށުގެ އަމަލުގައި އޭނާ ބައިވެރިވެފައިވާ ގޮތާއި އޭނާގެ ޖިނާއީ ކުށުގެ ތުހުމަތުގެ ރެކޯޑް އޮތުމުން ކުށް ތަކުރާރުކޮށްފާނެތީ އޭނާ ބަންދުގައި ބަހައްޓަން އަމުރުކުރާ ކަމަށް އަމުރުގައިވެ އެވެ.
