ވިލިމާލޭގެ ދެ ކަނޑުއޮޅި ބަންދުކޮށް، ދަތުރުކުރާނަމަ ލައިސެންސް ހިފަހައްޓަން ނިންމައިފި

ޓްރާންސްޕޯޓް މިނިސްޓްރީން މިއަދު ބުނީ، ވިލިމާލެ ދެ ކަނޑުއޮޅި ބަންދުކުރީ، އެ ތަންތަނުން ދަތުރުނުކުރުމަށް ތަކުރާރުކޮށް މަނާކޮށް، ދަތުރު ނުކުރުމަށް އިލްތިމާސްކުރި ނަމަވެސް، ކަނޑުއޮޅި ބޭނުންކުރުން ނުހުއްޓާތީ ކަމަށެވެ. ހާއްސަކޮށް ރިޒޯޓްތަކުގެ ލޯންޗުތައް އެ ދެ ކަނޑުއޮޅި ބޭނުންކުރަމުން ގެންދާ ކަމަށް މިނިސްޓްރީން ބުންޏެވެ.

ޓްރާންސްޕޯޓް މިނިސްޓްރީން އެ ދެ ކަނޑުއޮޅިން ދަތުރުކުރުން މަނާކުރީ، ބްރިޖު މަޝްރޫއުއާ ގުޅޭ ގިނަ މަސައްކަތްތަކަށް ބާޖާއި ސެލްފް އެލެވޭޓަޑް ޕްލެޓްފޯމްތައް ބޭނުންކޮށްގެން، އެ ދެ ކަނޑުއޮޅީގައި މަސައްކަތް ކުރަމުންދާތީ އާއި އެ ދެ ކަނޑުއޮޅީގައި ނަގިލި އެޅުމަށް ގިނަ އަދަދެއްގެ ބޮއިތަކާއި އެކިއެކި ވާތަށް އަޅާފައި އޮތުމުން އެ ދެ ކަނޑުއޮޅި ބޭނުން ކުރަމުންދާ އާންމު އުޅަނދުތަކަށް ނުރައްކާތެރި ހާދިސާއެއް ދިމާވެދާނެތީ އެވެ.

ޓްރާންސްޕޯޓް މިނިސްޓްރީން ބުނީ، ރާއްޖޭގެ ކަނޑުގެ ސަރަހައްދުގައި ދުއްވާ ލޯކަލް އުޅަނދުފަހަރު ދުއްވުމުގެ ލައިސަންސާ ބެހޭ ގަވާއިދުގެ ދަށުން ކަނޑުގެ ވަކި ސަރަހައްދަކަށް ވަނުން މަނާކޮށްފައިވާ ސަރަހައްދަކަށް ވަދެއްޖެ ނަމަ އެ ފަރާތެއްގެ ލައިސަންސް އެއް މަސް ދުވަހަށް ހިފެހެއްޓުމަށް ކަނޑައަޅާފައިވާ ގޮތަށް ވިލިމާލޭގެ ދެ ކަނޑުއޮޅިން ދަތުރުފަތުރުކުރާ ފަރާތްތަކުގެ ލައިސަންސް ހިފަހައްޓާނެ ކަމަށެވެ.