އިޒްރޭލަށް ހަތިޔާރު ވިއްކުން މަނާކޮށް ޖަވާބުދާރީ ކުރުވަން ރާއްޖެއިން ގޮވާލައިފި

އިޒްރޭލަށް، ހަތިޔާރު ވިއްކުން މަނާކުރުމަށް ރާއްޖެއިން ގޮވާލައިފި އެވެ.

ރާއްޖެއިން އެގޮތަށް ގޮވާލީ އިއްޔެ ބޭއްވި ”ޔުނައިޓެޑް ނޭޝަންސް ޖެނެރަލް އެސެމްބްލީ އޮން ދަ ޔޫޒް އޮފް ވީޓޯ“ ބައްދަލުވުމުގަ އެވެ.

އެ ބައްދަލުވުމުގައި ރާއްޖޭގެ ފަރާތުން ބަޔާން އިއްވަމުން ރާއްޖެއިން އދ. އަށް ކަނޑައަޅާފައި ހުންނަވާ ސަފީރު ޑރ. އަލީ ނަސީރު ވިދާޅުވީ މިދިޔަ ފެބްރުއަރީ މަހުގެ 20 ވަނަ ދުވަހު ޔުނައިޑެޓް ނޭޝަންސް ސެކިއުރެޓީ ކައުންސިލް (ޔޫއެންއެސްސީ) އަށް އިޒްރޭލާ ދެކޮޅަށް ހުށަހެޅި މައްސަލަ ވީޓޯ ކުރުމުގެ ސަބަބުން ފަލަސްތީނުގެ ރައްޔިތުން މެރުމަށާއި ޒަހަމް ކުރުމަށް އިޒްރޭލަށް ލައިސަންސެއް ލިބިދީފައިވާ ކަމަށެވެ.

އެގޮތުން ފެބްރުއަރީ މަހުގެ 29 ވަނަ ދުވަހު، އިންސާނީ އެހީއަށް ބޭނުންވެފައިވާ ފަލަސްތީނުގެ ރައްޔިތުންނާ ދެކޮޅަށް އިޒްރޭލުން ދިން ހަމަލާ ރާއްޖެއިން ފާހަގަކުރި އެވެ.

ނަސީރު ވިދާޅުވީ، ފަލަސްތީނުގެ ރައްޔިތުންނާ ދެކޮޅަށް އިޒްރޭލުން ހިންގަމުންދާ ގަތުލުއާންމާ ދެކޮޅަށް ޔޫއެންއެސްސީން މިހާރުން މިހާރަށް ފިޔަވަޅައި ގަތުލުއާންމު ހުއްޓުވަން މަސައްކަތް ކުރަންޖެހޭ ކަމަށެވެ. އަދި ބައިނަލްއަގުވާމީ މުޖުތަމައުން އިޒްރޭލުން ހިންގާ ހަނގުރާމަވެރި ކުށްތަކާ ދެކޮޅަށް މަސައްކަތްކޮށް، އިޒްރޭލު ޖަވާބުދާރީ ކުރުވުމަށް މަސައްކަތް ކުރަންޖެހޭ ކަމަށްވެސް ވިދާޅުވި އެވެ.