ކުނި ކަހަން ހުރި މީހެއްގެ ގައިގައި ސައިކަލަކުން ޖައްސައި ފިލި ބަޔަކު ހޯދަނީ

ކުނި ކަހަން ހުރި މީހެއްގެ ގައިގައި ސައިކަލަކުން ޖައްސައި ފިލި ބަޔަކު ހޯދަމުންދާކަމަށް ފުލުހުން ބުނެފިއެވެ.

ފުލުހުން މިއަދު ބުނީ އިއްޒުއްދީން މަގުގައި ކުނި ކަހަން ހުރި މީހެއްގައި އެ މަގުން ދުއްވާފައިދިޔަ ސައިކަލެއް ޖެހި، އެކްސިޑެންޓެއް ހިނގާފައިވާކަމުގެ ރިޕޯޓު ރޭ 23:17 އެހާކަންހާއިރު ލިބިފައިވާ ކަމަށެވެ.

ސައިކަލުގައި ތިބީ ދެ މީހުން ކަމަށާއި ކުނި ކަހަން ހުރި މީހާގެ ގައިގައި ސައިކަލް ޖެހުމުންވެސް މަޑުނުކޮށް، އެ ދެ މީހުން ފިލައިފައިވާކަމަށް ފުލުހުން ބުންޏެވެ. އެހެންވެ އެ ސައިކަލާއެކު އެ ދެ މީހުން ހޯދުމުގެ މަސައްކަތް ކުރަމުން އަންނަ ކަމަށެވެ.

އެކްސިޑެންޓުގައި އަނިޔާވީ 48 އަހަރުގެ ދިވެހި އަންހެނަކަށް ކަމަށާއި އޭނާއަށް އައިޖީއެމްއެޗްގައި ފަރުވާ ދެމުން އަންނަ ކަމަށް ފުލުހުން ބުންޏެވެ.