މަޝްރޫއުތައް ފަސޭހައިން ތަންފީޒު ކުރުމަށް އާރުޑީސީގެ އޮފީހެއް އައްޑޫގައި ހުޅުވައިފި

އައްޑޫ ސިޓީ ހިތަދޫގައި ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ)ގެ އޮފީހެއް ހުޅުވައިފި އެވެ.

އެ އޮފީސް ހުޅުވައިދެއްވީ އެކަމަށްޓަކައި އިއްޔެ އެ އޮފީސް ކުރިމަތީގައި ބޭއްވި ހަފުލާއެއްގައި އެމްއޭސީއެލްގެ މެނޭޖިން ޑިރެކްޓަރު އަދި ސީއީއޯ އިބްރާހިމް ޝަރީފް މުހައްމަދެވެ.

އެ ރަސްމިއްޔާތުގައި އާރުޑީސީގެ މެނޭޖިން ޑިރެކްޓަރު ބްރިގޭޑިއާ ޖެނެރަލް (ރޓ) އަލީ ޒުހައިރާއި ކޯޕަރޭޝަންގެ އިސްވެރިނާއި ސަރުކާރު އިދާރާތަކުގެ އިސްވެރިންނާއި އައްޑޫ ސިޓީގެ ކަމުވޮށިގެންވާ ބޭފުޅުން ބައިވެރިވެވަޑައިގެންނެވި އެވެ.

އާރުޑީސީން ބުނީ، އައްޑޫގައި އެ ކުންފުނީގެ އޮފީހެއް ހުޅުވުމުގެ ބޭނުމަކީ އައްޑޫ ސިޓީއާއި ރާއްޖޭގެ ދެކުނުގައި ސަރުކާރުން ހިންގާ މަޝްރޫއުތަކުގެ ތެރެއިން އެ ކުންފުންޏާ ގުޅުން ހުރި މަޝްރޫއުތަކާއި މަސައްކަތްތައް އެންމެ ފަސޭހަކޮށް ތަންފީޒު ކުރެވޭނީ އެ ކުންފުނީގެ އޮފީހެއް އެ ސަރަހައްދުގައި ގާއިމުކޮށްގެން ކަމަށް ސަރުކާރުން ދެކޭތީ ކަމަށެވެ.