ކޮޅުވެއްޓި ދަށުގައި މަރުވެފައި އޮއްވާ ފެނުނީ މަލިކު ޒުވާނެއް

ކޮޅުވެއްޓި ބަންޑުން ޖަހާލައިގެން ކަނޑުވެ، އިއްޔެ މަރުވީ މަލިކަށް ނިސްބަތްވާ ޒުވާނެއް ކަމަށް އެނގިއްޖެ އެވެ.

ރ. ކުޑަކުރަތު ރިސޯޓުން ފުރައިގެން މާލެއަށް ދަތުރު ކުރަމުންދިޔަ ”ލިއޯ ޕާލް“ ނަމަކަށް ކިޔާ އެ ކޮޅުވެއްޓި ބަންޑުން ޖަހާއިރު އޭގައި ފަސް މީހުން ތިއްބެވެ. އޭގެ ތެރެއިން ހަތަރު މީހުން ކަނޑުވެފައި ވަނިކޮށް ސަލާމަތް ކުރި އިރު، ގެއްލުނީ އޭގައި ދަތުރުކުރި ބިދޭސީ އެކެވެ. އޭނާ ފެނުނީ ކޮޅުވެއްޓި ދަށުގައި މަރުވެފައި އޮއްވަ އެވެ.

ތާރީހު ދިރާސާ ކުރާ އަދި މަލިކަށް ޒިޔާރަތްކޮށް އެ ރަށުގެ މީހުންނާއި ގާތް ގުޅުމެއް އޮންނަ ބޭފުޅެއް ކަމަށްވާ ނާޖިހު ދީދީ ވަނީ މަރުވި މީހާގެ ވަނަވަރާއި ފޮޓޯ އާންމުކޮށްފަ އެވެ.

އޭނާ ވިދާޅުވި ގޮތުގައި މަރުވީ މަލިކު ޒުވާނެކެވެ. އެއީ ކެނޑިފާޓި އަވަށު ކަޑަފަތްގޭ ޝާހިދު ނަމަކަށް ކިޔާ މީހެއް ކަމަށްވެސް ވިދާޅުވި އެވެ.