އިންމުގެ އަމަލު ގޯސްކޮށް ރައީސް: މީހަކު ކުރާ ކުށެއްގެ ނާޖައިޒު ފައިދާ ނަގައި، ފަލީހަތް ކޮށްގެން ނުވާނެ

މީހަކަށް ކުރެވޭ ކުށެއްގެ ނާޖައިޒު ފައިދާ ނަގައި، ވީޑިއޯކޮށް ފަލީހަތް ކުރުމަކީ އެއްވެސް ގޮތަކަށް ކޮށްގެން ވާނެ ކަމެއް ނޫން ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ރައީސް މިހެން ވިދާޅުވީ ކުރީގެ ހޯމް މިނިސްޓަރު ޝައިހް އިމްރާން އަބްދުﷲ ގެ ކާރުގައި އާންމު މީހެއްގެ ޕިކަޕެއް ޖެހި އެކްސިޑެންޓާ ގުޅިގެން ހެންވޭރު ދެކުނު ދާއިރާގެ އިންތިހާބީ މެންބަރު އިމްރާން ލަތީފް (އިންމު) އަމަލު ކުރެއްވި ގޮތަށް ބައެއް އާންމުންގެ ފާޑުކިޔުން އަމާޒުވެފައި ވަނިކޮށެވެ.

އެ އެކްސިޑެންޓާ ގުޅިގެން އުފެދުނު ނުތަނަވަސްކަން ފިނިކުރައްވަން އިންމު އުޅުއްވާ ވީޑިއޯއެއް އާންމުވެފައިވާއިރު، ޕިކަޕުގެ ޑްރައިވަރު ކައިރީ ބަހައްޓަވައިގެން މިނިސްޓަރު އިމްރާން ކައިރިން އިންމު އެދިވަޑައިގެންނެވީ މާފުކުރުމަށެވެ. ނަމަވެސް އެ ވީޑިއޯގައި އިމްރާންގެ މޫނުމަތިން ފެނުނީ ހިތްހަމަނުޖެހުމެވެ.

އަދި ކުށެއް ކޮށްފި މީހަކާ މެދު ކަންކުރާނޭ ގޮތް ގާނޫނުގައި ބަޔާންކޮށްފައިވާ ކަމަށާއި އެކަމަށް ފިޔަވަޅު އަޅަން މުއައްސަސާތަކާއި ގާނޫނީ ނިޒާމު ގާއިމުވެފައިވާ ކަމަށްވެސް ވިދާޅުވި އެވެ.

ރައީސް ވިދާޅުވީ، ދީނީ ގޮތުންނާއި އިޖުތިމާއީ ގޮތުން އޮންނަ ރިވެތި މިންގަނޑުތައް ދޫކޮށް ގާނޫނުގެ ވެރިކަން އަމިއްލަ އަތްމައްޗަށް ނެގުމަކީ މުޖުތަމައުން ނައްތާލަން މަސައްކަތް ކުރާ ބަދަލުހިފުމުގެ ރޫހު ނައްތާލުމަށްވެސް އެޅޭ ހުރަހަކަށް ނޫނީ ނުވާނެ ކަމަށެވެ.

އަދި އެންމެންނަކީ އޯގާތެރި، ކުލުނުވެރި، އަދި ޒިންމާދާރު މުޖުތަމައެއް ބިނާކުރުމުގައި ޒިންމާދާރު ބަޔަކަށް ވުމަށް އެ މަނިކުފާނު އެދިވަޑައިގެންނެވި އެވެ.