އަނިޔާ ލިބި، ބިކަ ހާލުގައި ޖެހެމުންދާ ފަލަސްތީން ކުދީންނަކީ ވެސް ދަރީން، އަސަރުކުރޭ: ރައީސް

ފަލަސްތީންގައި އާއިލީ ލޯބިން މަހުރޫމުވަމުން އެދާ މައުސޫމް ކުދީންނަކީ ހަމަ ދަރީން ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

މިއަދު ފާހަގަކުރާ ރާއްޖޭގެ ކުޑަކުދިންގެ ދުވަހުގެ މުނާސަބަތުގައި އެ މަނިކުފާނު ފޮނުއްވި ހިތާބުގައި ވިދާޅުވީ، ކުޑަކުދީންގެ ދުވަހެއްގައި، ހިތަށް ވެރިވާ އުފާވެރި އަދި އުންމީދީ އިހުސާސްތަކާއެކު، ފަލަސްތީނުގެ ބިމުގައި އަނިޔާ ލިބި، ބިކަ ހާލުގައި ޖެހެމުންދާ އެތައް ހާސް ކުޑަކުދީންނެއްގެ ސަބަބުން މިއަދު އަސަރުކުރުވާ ކަމަށެވެ.

”އިޒްރޭލުގެ އަނިޔާވެރި އަތްތަކުގެ ޝިކާރައަކަށްވެ، ހަޔާތުގެ ޅަނދޮޅު ފޯވަހީގެ އެންމެ ހިތްފަހި ދުވަސްތަކުގެ އުފަލާއި، ތައުލީމާއި، އާއިލީ ލޯބިން މަހުރޫމުވަމުން އެދާ މައުސޫމް ކުދީންނަކީ ހަމަ އަޅުގަނޑުމެންގެވެސް ދަރީންނެވެ،“ ރައީސް ވިދާޅުވި އެވެ.

އެ މަނިކުފާނުގެ ހިތާބުގައި ފަލަސްތީން ކުދީންގެ ތެރެއިން ޝަހީދުވާ ކޮންމެ ކުއްޖަކަށް ސުވަރުގޭގައި ކީރިތިﷲ ވައުދުވެވޮޑިގެންފައިވާ މަތިވެރި ނިއުމަތް މިންވަރު ކުރެއްވުމަށާއި އަނިޔާ ލިބި ގެދޮރާއި ސަހަރޯވެރީން ގެއްލި ނިކަމެތިވަމުންދާ ކޮންމެ ކުއްޖަކަށް ކީރިތި ﷲގެ ރަހުމަތާއި މަދަދުގެ ހާސްދޮރު ހުޅުއްވައި ދެއްވުމަށް ދުއާ ކުރައްވާފައިވެ އެވެ.