ތިން މީހުންނާއެކު މުދާ އުފުލާ ދޯންޏެއް ގެއްލިގެން ހޯދަނީ

ކ. ތިލަފުށިން ފުރައިގެން މ. އަތޮޅަށް ދަތުރުކުރަމުން ދިޔަ ދޯންޏެއް ގެއްލިގެން އެމްއެންޑީއެފްގެ ކޯސްޓުގާޑުން ހަރަކާތްތެރިވާން ފަށައިފި އެވެ.

ގެއްލިފައި ވަނީ މ. މެދުފުށި އައިލެންޑް ރިޒޯޓަށް ދަތުރު ފެށި “AAA-37“ ނަމަކަށް ކިޔާ މުދާ އުފުލާ ދޯންޏެކެވެ. އެ ދޯނީގައި ތިން މީހަކު ތިބި ކަމަށްވެ އެވެ.

އެމްއެންޑީއެފް އިން ބުނީ، އެ ދޯނި ދަތުރު ފެށީ އިއްޔެ އިއްޔެ ހެނދުނު ހައެއް ޖަހާކަންހާއިރު ކަމަށާއި ނަމަވެސް ދޯނީގެ ހަބަރެއް ނުވެގެން ރިޕޯޓުކުރީ އިއްޔެ ހަވީރު 17:20 ގައި ކަމަށެވެ. އަދި ދޯނި ހޯދުމުގެ މަސައްކަތުގައި އެމްއެންޑީއެފް ކޯސްޓްގާޑް ޝިޕް ޝަހީދު އަލީ ހަރަކާތްތެރިވަމުންދާ ކަމަށް ބުންޏެވެ.

މި ދުވަސްކޮޅު ރާއްޖޭގެ ހުރިހާ ހިސާބަކަށް ވެސް މޫސުން ގޯސްވާނެތީ ރައްކާތެރިވެ ތިބުމަށް ކަމާ ގުޅޭ އިދާރާތަކުން އަންނަނީ އިލްތިމާސް ކުރަމުންނެވެ. އެގޮތުން ވައިގަދަވެ، ކަނޑުތައްވެސް ގަދަވާނެ ކަމުގެ އިންޒާރު ދަނީ ދެމުންނެވެ.