އުއްމީދަކީ މިހާތަނަށް ދެކޭ އެންމެ ޒިންމާދާރު، ރައްޔިތުންނަށް މަންފާކުރާނެ މަޖިލީހަށް ވުން: ރައީސް

ވިހިވަނަ ރައްޔިތުންގެ މަޖިލީހަށް ހޮވުނު މެންބަރުން މިއަދު ވަނީ މެންބަރުކަމުގެ ހުވައި ކުރައްވައި، މަސައްކަތް ފަށައިފަ އެވެ.

ރައްޔިތުންގެ މަޖިލީހުގެ އާ މެންބަރުންނަށް މަރުހަބާ ވިދާޅުވެ، އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ ރާއްޖޭގެ ބަރުލަމާނީ ހަޔާތުގައި މިހާތަނަށް ދެކޭ އެންމެ ޒިންމާދާރު، އެންމެ އިތުބާރުހުރި ގައުމާއި ރައްޔިތުންނަށް އެންމެ މަންފާ ހުރި ގޮތުގައި ކަންކަން ނިންމާ މަޖިލީހަށް މި ފަހަރު މަޖިލިސް ވެގެންދާނެ ކަމަށް އުންމީދު ކުރައްވާ ކަމަށެވެ.

މިއަދު ހުވާކުރި 20 ވަނަ މަޖިލީހުގައި 93 މެންބަރުން ތިއްބަވާނެ އެވެ. އޭގެ ތެރެއިން ސަރުކާރު ހިންގާ ޕްރޮގްރެސިވް ކޮންގްރެސް ޕާޓީ (ޕީއެންސީ)ގެ 75 މެންބަރުން ތިއްބަވާނެ އެވެ. އެއީ ސުޕަ މެޖޯރިޓީ އެވެ. އެއާއެކު ގާނޫނުއަސާސީއަށް ބަދަލު ގެނައުމުގެ ބާރު ސަރުކާރު މެޖޯރިޓީއަށް އެބަ އޮތެވެ.

އެ އަދަދާއެކު ޖުމްހޫރީ ޕާޓީގެ ލީޑަރު ގާސިމް އިބްރާހިމް އާއި އެމްއެންޕީގެ ލީޑަރު މުހައްމަދު ނާޒިމްގެ އިތުރުން އެމްޑީއޭގެ ލީޑަރު އަހުމަދު ސިޔާމް މުހައްމަދުގެ އިތުރުން އެ ޕާޓީއަށް ނިސްބަތްވާ ވެލިދޫ ދާއިރާގެ މެންބަރު މުހައްމަދު އައްބާސް ވެސް މަސައްކަތް ކުރައްވާނީ ސަރުކާރާއެކު އެވެ.

އެހެންކަމުން ޕީއެންސީގެ މެންބަރުންނާއި ސަރުކާރަށް ތާއީދު ކުރާ މެންބަރުންނާއެކު އެ އަދަދު 79 އަށް އަރަ އެވެ.