ފަލަސްތީން ރައްޔިތުން ހިމާޔަތް ކުރުމަށް އިސްލާމީ އުއްމަތް މިއަދު ވަނީ ނުކުޅެދިފައި: ހުތުބާ

އިސްލާމް ދީނަކީ އިއްޒަތްތެރިކަން ލިބިގެންވާ ދީނެއް ނަމަވެސް, މިއަދު މުސްލިމުން ވަނީ ވަރަށް ނިކަމެތިވެފައި ކަމަށް މިއަދުގެ އީދު ހުތުބާގައި ބުނެފި އެވެ.

އަޟުހާ އީދު ދުވަހުގެ ހުތުބާގައި ބުނީ, މުސްލިމުންނަކީ މާތް الله އިސްލާމްދީނުގެ ސަބަބުން އިއްޒަތްތެރިކަން ދެއްވައިފައިވާ ބައެއް ނަމަވެސް މިއަދު މުސްލިމުން ވަނީ ވަރަށް ނިކަމެތިވެފައި ކަމަށެވެ.

އެ ކަން އެންމެ ބޮޑަށް ދޭހަކޮށްދޭ އެއް ކަމަކީ ފަލަސްތީނުގެ ރަފަހާއި އައްޒާއާއި އެހެނިހެން ބިންތަކަށް ޔަހޫދީން ވެރިވެގަނެފައިވީ ހިނދުވެސް މީސްތަކުންގެ އަދަދާއި ގުދުރަތީ ވަސީލަތްތައް ގިނަވެފައިވާ މި އުއްމަތް, ފަލަސްތީންގެ އަހުންނާއި އުހުތުން ހިމާޔަތްކުރުމަށް ނުކުޅެދިފައިވުން ކަމަށް ބުންޏެވެ.

އެހެންކަމުން ހުތުބާގައި ވަނީ އިސްލާމީ އުންމަތް ބިނާކުރުމަށާއި އިލްމާއި ތައުލީމު ކުރިއެރުވުމުގައި ކުރިއަރައިދިއުމަށް މަސައްކަތް ކުރުމަށް ގޮވާލައިފަ އެވެ. އަދި މާތް الله އާއި ކީރިތި ރަސޫލާގެ އަދުއްވުން, އިސްލާމް ދީނާ ދެކޮޅަށް ރާވާ މަކަރުވެރި ރޭވުންތަކާ ދެކޮޅަށް އެއްބައިވަންތަކަމާއެކު ކުރިމަތިލުމަށްވެސް ގޮވާލި އެވެ.

ހުތުބާގައި ބުނީ, ގައުމަކަށް ލިބޭނެ އެންމެ ބޮޑު ނިއުމަތަކީ އެ ގައުމުގެ އަހުލުވެރިންނަކީ މާތް الله އެއްކައުވަންތަކޮށް އާހިރަތް ދުވަހަށް އީމާންވާ ބަޔަކަށްވުން ކަމަށާއި އޭރުން މާތް اللهއަށް ބިރުވެތިވެ, އެކަލާނގެއަށް ޖަވާބުދާރީ ވާންޖެހޭ ދުވަހެއް އަންނާނެކަން ގަބޫލުކުރާ ބަޔެއްގެ މެދުގައި ފަސާދަތައް މަދުވާނެ ކަމަށެވެ.

ގައުމަށް ލިބޭނެ ބޮޑު އަނެއް ނިއުމަތަކީ އެ ގައުމަކީ އަމަންއަމާންކަން ލިބިފައިވާ އަދި އެ ގައުމުގެ އަހުލުވެރިންނަކީ އުފާ ފާގަތިކަން ލިބިފައިވާ ބަޔަކަށްވުންކަން ކަމަށާއި އެ ކަންކަން އެ ބަޔަކަށް ހާސިލުވާނީ, ދޭދޭ ފަރުދުންގެ ގުޅުންތައް ވަރުގަދަވެ, އެއްބައިވަންތަ ބަޔަކަށްވެ, އަމިއްލަ މަސްލަހަތުގެ ބަދަލުގައި ދީނާއި ވަތަނުގެ މަސްލަހަތު އިސްކޮށްގެން ކަމަށް ހުތުބާގައި ބުންޏެވެ.

ހުތުބާގައި ބުނީ, މާތް ނަބިއްޔާގެ އިރުޝާދުގައިވާ ގޮތަށް އަހަރެމެން މުސްލިމުން އުފާ ފާޅުކުރާއިރު އިސްލާމް ދީނުގެ އުސޫލުތަކަށް ތަބައަވާންޖެހޭ ކަމަށާއި ދީނުގައި ހަރާމްކުރައްވައިފައިވާ ކަންކަން ކުރުމާއި އުފާ ފާޅުކުރުމުގައި އެހެން ދީންތަކުގެ އަހުލުވެރީންގެ ގޮތްތައް ކޮޕީކުރުން ދޫކޮށްލާންޖެހޭ ކަމަށެވެ.