ފުލުހުންނަށްވެސް ޑްރޯންތަކެއް، ލިބުނީ ކަނޑާއި ވައިގެ ތެރޭގައި ދުއްވާ 2 ޑްރޯން

ކަނޑުމަތީގެ އޮޕަރޭޝަންތަކުގައި ބޭނުންކުރަން ފުލުހުންނަށް ދެ ޑްރޯން ލިބިއްޖެ އެވެ.

ހޯމް މިނިސްޓްރީން މީޑިއާތަކަށް ބުނީ، ޔުނައިޓެޑް ނޭޝަންސް އޮފީސް އޮން ޑްރަގްސް އެންޑް ކްރައިމް (ޔޫއެންއޯޑީސީ) އިން ހަދިޔާކުރީ ކަނޑާއި ވައިގެ ތެރޭގައި ދުއްވާ ދެ ޑްރޯން ކަމަށެވެ.

އެ ޑްރޯން ބޭނުންކުރަން ހަމަޖެހިފައިވަނީ މެރިން ޕޮލިސް ޑިވިޝަނުން ހިންގާ ޝޯޓް ރޭންޖް އޮޕަރޭޝަންތަކުގައި ކަމަށްވެސް ބުންޏެވެ.

އެ ޑްރޯންތައް ހަވާލުކުރުމަށް ހޯމް މިނިސްޓްރީގައި މިއަދު ބޭއްވި ރަސްމިއްޔާތުގައި އެކަމާ ގުޅޭ އެއްބަސްވުމުގައި ހޯމް މިނިސްޓްރީގެ ފަރާތުން ސޮއިކުރެއްވީ މިނިސްޓަރު އަލީ އިހުސާނެވެ.

ޔޫއެންޑީސީގެ ފަރާތުން ސޮއިކުރެއްވީ ރާއްޖޭގައި ހުންނަ އެ ޖަމިއްޔާގެ އޮފީހުގެ އިސްވެރިޔާ އެންރިކޯ ބޮނިންސެގްނާ އެވެ.

ފުލުހުންނަށް ކަނޑާއި ވައިގެ ތެރޭގައި ދުއްވާ ދެ ޑްރޯން ލިބުނު އިރު، މި ސަރުކާރުން ވަނީ ތުރުކީ އިން ދެ ޑްރޯން ގަނެފަ އެވެ. އެ ޑްރޯންތައް އޮޕަރޭޓް ކުރަނީ އެމްއެންޑީއެފް އިންނެވެ.

ނަމަވެސް ޑްރޯން ބޭނުން ކޮށްގެން މިހާތަނަށް ހިންގާފައިވާ ކަމަށް އެމްއެންޑީއެފުން މައުލޫމާތު ދީފައިވަނީ އެންމެ ސާޗް އޮޕަރޭޝަނެއްގަ އެވެ.