މަޝްހޫރު ވިޔަފާރިވެރިޔާ އަދި މީދޫ ދާއިރާގެ މެމްބަރު އަހުމަދު ސިޔާމް މުހައްމަދު (ސަންޓްރެވަލް ސިޔާމް) އަށް އެއް އަހަރު ތެރޭ އާމްދަނީއާއި ޑިވިޑެންޑްގެ ގޮތުގައި 6.6 މިލިއަން އެމެރިކާ ޑޮލަރާއި 5 މިލިއަން ދިވެހި ރުފިޔާ ލިބިފައިވާ ކަމަށް މާލީ ބަޔާނުން ދައްކައިފި އެވެ.
ވިހިވަނަ މަޖިލީހުގެ މެމްބަރުންގެ ދެވަނަ އަހަރުގެ މާލީ ބަޔާން މަޖިލީހުގެ ވެބްސައިޓުގައި މިހާރު ވަނީ ޝާއިއުކޮށްފަ އެވެ. އެއީ 28 މޭ 2025 އިން 27 މޭ 2026ގެ ބަޔާނެވެ.
ސިޔާމްގެ މާލީ ބަޔާން ދައްކާ ގޮތުން މިދިޔަ އެއް އަހަރު ތެރޭގައި އޭނާއަށް މަޖިލީހުން 604,567 ރުފިޔާގެ އާމްދަނީއެއް ލިބިފައިވެ އެވެ. ސަންސިޔާމް ގްރޫޕް އޮފް ކޮމްޕެނީސް އިން އާމްދަނީގެ ގޮތުގައި ލިބިފައިވަނީ 6,540,194 މިލިއަން ޑޮލަރެވެ.
އޭގެ އިތުރުން ކުންފުންޏާއި ޕާޓްނާޝިޕް ހިއްސާގެ ފައިދާގެ ގޮތުގައި ބޭންކް އޮފް މޯލްޑިވްސް އިން 1.3 މިލިއަން ރުފިޔާ އަދި ކޮމްޕެނީސް އާމްދަނީ ޑިވިޑެންޑްގެ ގޮތުގައި 54,000 ޑޮލަރު ލިބިފައިވެ އެވެ.
ސިޔާމްގެ ބާލީ ބަޔާނުގައިވާ ގޮތުން ރާއްޖޭގައި ހުޅުވާފައިވާ ހަތަރު އެކައުންޓެއް އަދި ސްރީ ލަންކާގައި ދެ އެކައުންޓަކާއި ޔޫއޭއީގައި ދެ އެކައުންޓް ހުޅުވާފައިވެ އެވެ. އެ އެކައުންޓުތަކުގައި 33.6 މިލިއަން ރުފިޔާ އަދި 1.9 މިލިއަން ޑޮލަރު ހުރި ކަމަށް ބުނެފައިވެ އެވެ.
