ހާޓް އެޓޭކާއި ސްޓްރޯކަށް މަގުފަހިކުރުވާ ނުރައްކާތެރި ޑުރަގެއް އަތުލައިގެންފި، އަގު 9 މިލިއަން ރުފިޔާ!

ރާއްޖެ އައި ނެދަލޭންޑްސްގެ ރައްޔިތެއްގެ ލަގެޖުން ޑުރަގް އަތުލައިގެންފި އެވެ.

މޯލްޑިވްސް ކަސްޓަމްސް އިން އިއްޔެ ބުނީ، މި މަހުގެ 11 ވަނަ ދުވަހު އައި އެ މީހާގެ އަތުން ފެނުނީ ހަ ކިލޯގެ ކެތިނޯން ކަމަށެވެ. އެ ތަކެތީގެ މަގުމަތީ އަގު 9.1 މިލިއަން ރުފިޔާއަށް އަރާ ކަމަށްވެސް ބުންޏެވެ.

ކެތިނޯން ނުވަތަ މަގުމަތީ ނަމުން ނަމަ ބާތް ސޯލްޓަކީ ގަޑުބަޑު ކޮށްގެން ބޭނުންކުރާ ނުރައްކާތެރި ޑުރަގެކެވެ.

އެ ޑުރަގް ބޭނުންކުރާ މީހުންނަށް ކުރު މުއްދަތުގެ ނަފުސާނީ ކަންކަމާ ކުރިމަތިލާންޖެހެ އެވެ. އޭގެ ތެރޭގައި ޑިޕްރެޝަނާއި ޕެނިކް އެޓޭކު އައުމާއި ހޮލޮސިނޭޝަން އަދި އަމިއްލައަށް މަރުވާން ބޭނުން ފަދަ ކަންކަން ކުރިމަތިވެ އެވެ.

އޭގެ އިތުރު އެ ޑްރަގް ބޭނުން ކުރާ މީހުންގެ ނޭފަތުން ލޭއައުމާއި ބޯއެނބުރުމާއި ސްޓްރޯކް ނުވަތަ ފިޓު ޖެހުމާއި މަސްގަނޑުތަކުގެ ބާރު ދިއުމާއި ލޭގެ ޕްރެޝަރު އިތުރުވުމައި ބޮލުގައި ރިއްސުމާއި މޭގައި ރިއްސުމުގެ އިތުރުން ހާޓް އެޓޭކު ޖެހުން ފަދަ ކަންކަންވެސް ދިމާވާ ކަމަށް ރިޕޯޓްތައް ބުނެ އެވެ.