އިންޑިއާ އަސްކަރިއްޔާ ބާލަން ވައުދުވެގެން އައިސް އެގައުމުގެ އުނގަށް އެރުމަކީ ހިޔާނާތެއް: އުމަރު

ރާއްޖެޓީވީގެ ސުވާލަކީ ޕްރޮގްރާމުގައި ވާހަކަދައްކަވަމުން އުމަރު ވިދާޅުވީ ރައީސް ޑރ. މުހައްމަދު މުއިއްޒުގެ ސަރުކާރު ވެރިކަމަށް އައީ އިންޑިއާގެ އަސްކަރިއްޔާ ބާލަން ކަމަށެވެ.

ނަމަވެސް އިންޑިއާގެ އަސްކަރިއްޔާ ކުރިންވެސް އޮތް ގޮތަށް އަދިވެސް ރާއްޖޭގައި އެބަ ތިބި ކަމަށާއި އިންޑިއާގެ ދެ ހެލިކޮޕްޓަރާއި މަތިންދާ ބޯޓަކާއި ރާޑަ ސްޓޭޝަންތައް އޮޕަރޭޓް ކުރަން ތިބީ އިންޑިއާގެ ޑިފެންސް މިނިސްޓްރީގެ މުވައްޒަފުން ކަމަށް އުމަރު ވިދާޅުވި އެވެ.

އޭނާ ވިދާޅުވީ، ރާއްޖޭގައ ތިބި އިންޑިއާގެ އަސްކަރިއްޔާ މީހުން މިހާރު ކުރާ މަސައްކަތަކީ ރާއްޖެއަށް ފާރަލުން ނޫން ކަމަށާއި އެ މީހުންގެ މަސައްކަތަކީ ޗައިނާއާއި ރަޝިއާއަށް ފާރަލުން ކަމަށެވެ.

”އެ މީހުންގެ ހެދުން ބަދަލުކޮށްފައި އެ މީހުންނަށް އެހެން ނަމެއް ކިޔަސް އެ މީހުންނަކީ އެއް ބައެއް. ރާއްޖޭގައި އިންޑިއާގެ އަސްކަރިއްޔާ އެބަ އޮތް. މި މީހުން އައީ ވަރަށް ބޮޑު އުއްމީދުގައި އަދި އެކަމުގެ ވަރަށް ބޮޑު ޕްރޮމިސްގައި. ވޯޓު ދިން ގިނަ މީހުންނަކީ އިންޑިއާގެ އަސްކަރިއްޔާ ފޮނުވާލުމަށްޓަކައި ވޯޓު ދިން މީހުން. އެއްގޮތަކަށްވެސް މުއިއްޒު މޮޅުފުޅުވެގެން ޕީއެންސީގެ ބޭފުޅުން މޮޅުވެގެން ދިން އެއްޗެއް ނޫން. މިއީ މިނިވަންކަމާއި އިންޑިއާގެ އަސްކަރިއްޔާ ފުރުވާލާނެކަމުގެ ޔަގީން ކަމާއެކު ދިން ވޯޓެއް. އެ ވޯޓުގައި އެހާ ބޮޑުކޮށް ޕްރޮމިސްކޮށްފައި އައިސް ކޮމްޕްލީޓް ޔޫޓާންއެއް ނަގާފައި ގޮސް އިބްރާހިމް މުހައްމަދު ސޯލިހުގެ ސަރުކާރުން އިންޑިއާއާ ގުޅުން ގާއިމުކުރި ވަރަށްވުރެ ބޮޑުކޮށް އުނގަށް އަރައި އިށީނދެ ގުޅުން ގާއިމުކޮށްގެން މި ތިބީ،“ އުމަރު ވިދާޅުވި އެވެ.