ބައްސާމް އެދުނު ގޮތަށް އެޕާޓްމަންޓްތައް ހަވާލުކުރަން ދިން މުއްދަތު ފުލުހުން އިތުރުކޮށްދީފި

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ކުރީގެ ރައީސް ބައްސާމް އާދިލް ޖަލީލް އެދުނު ގޮތަށް، ހުޅުމާލޭގައި ހުންނަ އަމީން އެވެނިއު އިން އޭނާ ގަތް ދެ އެޕާޓްމެންޓް ހަވާލުކުރަން ދިން މުއްދަތު ފުލުހުން އިތުރުކޮށްދީފި އެވެ.

އެފްއޭއެމްގެ ފައިސާ އިން ގަނެފައިވާ ކަމަށް ތުހުމަތުކުރާ އެ އެޕާޓްމަންޓް މިއަދުގެ ކުރިން ފުލުހުންނާ ހަވާލުކުރަން ކޯޓުން ވަނީ އަމުރުކޮށްފަ އެވެ.

ނަމަވެސް ފުލުހުންނަށް ފޮނުވި ސިޓީއެއްގައި ބައްސާމް ވިދާޅުވީ އެޕާޓްމެންޓްތައް ހަވާލުކޮށްފިނަމަ އޭނާ ދަރިންނާއެކު ވަންނާނެ އިތުރު އެހެން ތަނެއް ނުހުންނާނެ ކަމަށެވެ. އެހެންވެ އެޕާޓްމެންޓް ހަވާލުކުރުމުގެ ކަންކަން މި މަހުގެ ނިޔަލަށް ފަސްކޮށް ދިނުމަށް އޭނާ އެދުނެވެ.

ފުލުހުން ދެންމެ މީޑިއާތަކަށް ފޮނުވި މެސެޖެއްގައި ބުނީ، ހާލަތަށް ރިއާޔަތްކޮށް، ސިޓީގައި އެދިފައިވާ މުއްދަތަށް ފުރުސަތު ދީފައިވާ ކަމަށެވެ. އަދި އެކަން ލިޔުމުން ބައްސާމަށް އަންގާފައިވާނެ ކަމަށްވެސް ބުންޏެވެ.

ފުލުހުންގެ ބުނެފައިވާ ގޮތުން ބައްސާމް އެ ދެ އެޕާޓްމަންޓް ގަތީ ކޮވިޑް-19 އާ ގުޅިގެން ރާއްޖޭގެ ފުޓްބޯޅް ކުލަބުތަކަށް މާލީ ގޮތުން އެހީވުމަށް އެފްއޭއެމްގެ ނަމުގައި ފީފާ އިން ހޯދި 1.9 މިލިއަން ޑޮލަރުންނެވެ. އަދި އެޕާޓްމެންޓު ގަތުމުގެ އެ މުއާމަލާތަކީ ޑޮލަރުގެ ގަތުމުގެ މުއާމަލާތެެއް ކަމަށް ދެއްކުމަށް މަސައްކަތް ކޮށްފައިވާ ކަމަށްވެސް ބުންޏެވެ.

ފުލުހުން އިތުރަށް ބުނީ، އެ ފައިސާ އެފްއޭއެމް އަށް ލިބިފައިވާކަން ދެއްކުމަށްޓަކައި ކުންފުންޏެއް މެދުވެރިކޮށް، ލޯނު ނަގާފައިވާކަންވެސް ފާހަގަކުރެވޭ ކަމަށާއި ފީފާ އިން ނެގި ފައިސާގެ އަދަދާއި އަމީން ކޮންޓްރަކްޝަނަށް ފައިސާ ދައްކާފައިވާ ރިސިޕްޓުތަކުގައި ބަޔާންކޮށްފައިވާ ފައިސާގެ އަދަދާ ދިމާވާ ކަމަށެވެ.

އެ މައްސަލައާ ގުޅިގެން އަމީން ކޮންސްޓްރަކްޝަންގެ މައްޗަށާއި ބައްސާމު އަދި މ. ހިރިނައިދޫ/ ހަސަން ވަހީދުގެ އިތުރުން ގއ. ގެމަނަފުށި މުހައްމަދު އަގީލުގެ މައްޗަށް، އޮޅުވާލުމާއި ހިޔާނާތުގެ ކުށާއި މަނީ ލޯންޑަރިންގެ ދައުވާ ކޮށްދިނުމަށް އެދި ޕްރޮސިކިއުޓާ ޖެނެރަލް އޮފީހަށް ވަނީ ފޮނުވައިފަ އެވެ.