ހަށިގަނޑުގައި ރައްކާކޮށްގެން ޑްރަގް ގެންދަން އުޅުނު މީހަކު އެއާޕޯޓުން ހައްޔަރުކޮށްފި

ހަށިގަނޑުގައި ރައްކާކޮށްގެން މަސްތުވާތަކެތި ގެންދަން އުޅޭކަމަށް ތުހުމަތުކުރެވޭ މައްސަަލައާކާ ގުޅިގެން ވެލާނާ އިންޓަނޭޝަނަލް އެއާޕޯޓް (ވީއައިއޭ)ގެ ޑޮމެސްޓިކް ޓާމިނަލުން ފުރަންގޮސް ހުރި މީހަކު ހައްޔަރުކޮށްފި އެވެ.

ފުލުހުން މިއަދު ބުނީ މިދިޔަ ހޯމަ ދުވަހުގެ ވަގުތެއްގައި އެއާޕޯޓުން ހައްޔަރުކޮށްފައިވަނީ ށ. ނޫމަރާ /ހަވީރީގެ، އަބްދުﷲ ފަސީހް (24އ) އެވެ. އަބްދުﷲ ފަސީހު، ހައްޔަރުކޮށް އޭނާ ބަލައިފާސްކުރުމުން، މަސްތުވާތަކެތި ކަމަށް ޝައްކުކުރެވޭ ތަކެތި ފެނުނު ކަމަށް ފުލުހުން ބުންޏެވެ.

އަބްދުﷲ ފާސިހުގެ ބަންދާއިމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ފަސް ދުވަހަށް ބަންދުކުރުމަށް އަމުރުކޮށްފައިވާ ކަމަށް ފުލުހުން ބުންޏެވެ.

އަބްދުﷲ ފަސީހުގެ އަތުން ފެނުނު އެތަކެތީގެ ބަރުދަނުގައި 340 ގްރާމް ހުރި ކަމަށް ފުލުހުން ބުންޏެވެ.

އެ މައްސަލަ އިތުރަށް ތަހުގީގު ކުރަމުންދާ ކަމަށް ފުލުހުން ބުންޏެވެ.