ޒިޔާ މަޖިލީހުން ވަކިކޮށްފި، ތުހުމަތު ކުރަނީ ވެރިންގެ ހަސަދަފިލުވައިލުމެއް ކަމަށް

ރައްޔިތުންގެ މަޖިލީހުގެ މީޑިއާ އެންޑް ކޮމިއުނިކޭޝަން ޑިރެކްޓަރުގެ މަގާމުގައި ހުންނެވި ހަސަން ޒިޔާއު (ޒިޔާ)، އެ މަގާމުން މިއަދު ވަކިކޮށްފިއެވެ.

ޒިޔާ މަގާމުން ވަކިކޮށްފައިވަނީ ޕާލިމަންޓްރީ ސާވިސްގެ ކޯޑް އޮފް ކޮންޑަކްޓާ ހިލާފުވި ކަމަށް ބުނެ އެވެ.

އެކަން ކަށަވަރު ކޮށްދެއްވަމުން ޒިޔާ މީޑިއާތަކަށް ފޮނުވި މެސެޖެއްގައި ބުނީ، އޭނާ ހުންނެވި މަގާމަކީ ސިޔާސީ މަގާމަކަށް ނުވާއިރު ނޯޓިސް ދިނުމަކާ ނުލާ އަވަސް އަރުވާލައިގެން އޭނާ ވަކިކޮށްފައިވަނީ ޕާލަމެންޓަރީ ސާވިސްގެ ގަވާއިދާ ހިލާފަށް ކަމަށެވެ.

”….ޕާލަމެންޓަރީ ސާވިސް ގަވާއިދުގެ ކޯޑު އޮފް ކޮންޑަކްޓާ ހިލާފުވި ކަމަށް ބުނެ ވަކިކޮށްފައިވަނީ ރައްޔިތުންގެ މަޖިލީހުގެ އިދާރާގެ އިސްވެރިން، ހާއްސަކޮށް މަޖިލީހުގެ އަމީން އާންމު ފާތިމަތު ނިއުޝާއާއި ޑެޕިއުޓީ ސެކްރެޓަރީ ޖެނެރަލް މުހައްމަދު ރަޝީދު އާއި ހެޑް އޮފް އެޑްމިނިސްޓްރޭޝަން އަހުމަދު ފާއިޒު އަދި ޑިރެކްޓަރު ފޮރިން ރިލޭޝަންސް ޒުއްޔިނާ ބަދުރީގެ ބައެއް ނިންމުންތަކާ ދެކޮޅަށް އަޅުގަނޑު ވާހަކަ ދައްކާފައިވާތީ، ޒާތީ ހަސަދަވެރިކަން ފިލުވުމަށް ކަމަށް ދެކެމެވެ. އަދި ބެކް ޑޭޓްކޮށް ބައެއް ޕްރޮކިއުމަންޓް ރިކުއެސްޓްތަކުގައި ސޮއިކުރުމަށް ދެކޮޅު ހަދާފައިވާތީ ކަމަށް ދެކެމެވެ.،“ ޒިޔާގެ މެސެޖުގައި ވިދާޅުވެފައިވެ އެވެ.

އޭނާ ވިދާޅުވީ، ޕާލަމެންޓަރީ ސާވިސް ގަވާއިދާ ހިލާފަށް ރާވައިގެން އޭނާ ވަޒީފާ އިން ވަކިކުރި މައްސަލަ ވަޒީފާއާބެހޭ ޓްރައިބިއުނަލްއަށާއި ހިއުމަން ރައިޓްސް ކޮމިޝަން އަދި މަޖިލީހުގެ އާންމު ކޮމިޓީއަށް ހުށަހަޅާނެ ކަމަށެވެ.