ޝަހީދުވެފައިވާ މީހުންގެ އާއިލާތަކަށް ހާއްސަ އެލަވެންސަކާއި ފްލެޓް ދެނީ

ގައުމުގެ ދިފާއުގައި ޝަހީދުވި ދިވެހީންގެ އާއިލާތަކަށް އަންނަ އަހަރު އެލަވަންސެއް ދޭން ފައްޓަވާނެ ކަމަށް ރައީސް ޑރ. މުހައްމަދު މުއިއްޒު އިއުލާން ކުރައްވައިފި އެވެ.

ރައީސް އެކަން އިއުލާން ކުރެއްވީ، މީގެ 36 އަހަރު ކުރިން ނޮވެމްބަރު 3، 1988 ގައި ހ. ހާޖަރާގޭ، އަބްދުﷲ ލުތުފީ އާއި ސ. ހިތަދޫ/ ޕެރިސްހޮލިޑޭ، އަހުމަދު ނާސިރާއި ސްރީ ލަންކާގެ ތަމަޅައިގެން 80 ވަރަކަށް މީހުން މާލެ އަރައި ވެރިކަން ބަދަލުކޮށް، ރާއްޖެ ހިފަން ދިން ހަމަލައިން ދިވެހިންނަށް ލިބުނު ކާމިޔާބީ ފާހަގަކުރުމަށް މިއަދު ފާހަގަކުރާ ނަސްރުގެ ދުވަހުގެ ރަސްމީ ޖަލްސާގަ އެވެ.

ރައީސް ވިދާޅުވީ ގައުމަށްޓަކައި ޝަހީދުވެވަޑައިގެންނެވި ބޭފުޅުން އެ ވެވަޑައިގެންނެވި ގުރުބާނީގެ އަގު ދައުލަތަކުން ނުދެއްކޭނެ ކަމަށާއި ނަމަވެސް ބޯހިޔާވަހިކަމެއް އަދި އިނާޔަތެއް ދެވެން ޖެހޭނެ ކަމަށް ގަބޫލު ކުރައްވާ ކަމަށެވެ. އަދި ޝަހީދުވެވަޑައިގެންނެވި ބޭފުޅުންގެ އާއިލާތަކަށް ދައުލަތުގެ ފަރާތުން ހާއްސަ އިނާޔަތެއް މީގެ ކުރިން ދެމުން އައި ނަމަވެސް އެކަން މިހާރު ހުއްޓިފައިވާ ކަމަށް ވިދާޅުވި އެވެ.

”މި އަންނަ އަހަރުން ފެށިގެން ޝަހީދުވި (ބޭފުޅުންގެ) އާއިލާތަކަށާއި އަދި ހަމަ އެއާއެކީގައި 3 ނޮވެމްބަރުގެ މެޑަލް ފޯ އެކްސެޕްޝަނަލް ބްރޭވަރީ ލިބުނު ފަސް ފަރާތާއި މެޑަލް ފޯ ބްރޭވަރީ ލިބުނު 10 ފަރާތް ހިމެނޭހެން މި ހުރިހާ ފަރާތްތަކަށް ކަނޑައެޅޭ ގެޒެޓު ކުރެވޭ އުސޫލެއްގެ މަތިން ސަރުކާރުން ދެމެހެއްޓެނިވި ގޮތެއްގައި ހާއްސަ އެލަވަންސެއް ދޭނެ ވާހަކަ އަޅުގަނޑު ދަންނަވަން.. އަދި ހަމަ އެއާ އެކީގައި ޝަހީދުވި (ބޭފުޅުންގެ) އާއިލާތަކަށް ހާއްސަކޮށް ޝަހީދުވީ ފަރާތްތަކަށް ހާއްސަ ކުރެވިގެން ހައުސިން ޕްރޮގުރާމެއް ޝަހީދުންގެ ހިޔާގެ ނަމުގައި 50 ހައުސިން ޔުނިޓު ހިމެނޭ ހައުސިން އިމާރާތެއް ކުރިއަށް އޮތް އަހަރުތަކުގައި، މި ދައުރުގެ ތެރޭގައި އަޅައި ނިންމައި މި އާއިލާތަކާ ހަވާލު ކުރާނަން،“ ރައީސް ވިދާޅުވި އެވެ.

ނަސްރުގެ ދުވަހެއް ފާހަގަކުރަނީ މީގެ 36 އަހަރު ކުރިން ނޮވެމްބަރު 3، 1988 ގައި ހ. ހާޖަރާގޭ އަބްދުﷲ ލުތުފީ އާއި ސ. ހިތަދޫ ޕެރިސްހޮލިޑޭ އަހުމަދު ނާސިރާއި ސްރީ ލަންކާގެ ތަމަޅައިގެން 80 ވަރަކަށް މީހުން މާލެ އަރައި ވެރިކަން ބަދަލުކޮށް، ރާއްޖެ ހިފަން ދިން ހަމަލައިން ދިވެހިންނަށް ލިބުނު ކާމިޔާބީ ފާހަގަކުރުމަށެވެ. އެ ހަމަލާގައި ސިފައިންގެ އަށް ބޭކަލަކާއި އާންމުންގެ 11 މީހަކު ޝަހީދުވި އެވެ.