އޭޕްރިލް 5, 2025

ޑޮލަރު މާރުކުރުމަށް ނިންމި ނިންމުމަށް ލުއި ދީފައިނުވާނެ: މުނައްވަރު

ޓޫރިޒަމް ދާއިރާގެ ވިޔަފާރިތަކުން ޑޮލަރު މާރުކުރަން މަޖުބޫރުކުރުމަށް ހަދާފައިވާ ގަވައިދަށް އެއްވެސް ބަދަލެއް ގެނެސް ޑޮލަރު މާރުކުރުމަށް ލުއިތަކެއް ދީފައިނުވާނެ ކަމަށް އެމްއެމްއޭގެ ގަވަރުނަރު އަހުމަދު މުނައްވަރު ވިދާޅުވެއްޖެ އެވެ.

އެމްއެމްއޭއިން ރޭވަނީ ”ބޭރު ފައިސާއާ ބެހޭ ބިލް“ގެ ނަމުގައި ބިލެއް އެކުލަވާލާ އާންމުންގެ ހިޔާލަށް ހުޅުވާލައިފައެވެ. އެ ބިލް، ގާނޫނަކަށް ވުމުން ޑޮލަރު މާރުކުރަން މަޖުބޫރުކުރުމަށް މިހާރު ހަދާފައިވާ ގަވައިދުގެ ތެރެއިން ޑޮލަރު މާރުކުރުމަށް ލުއިތަކެއް ލިބިގެންދާ ކަމަށް ބުނެ ބައެއް މީޑިއާތަކުން ވަނީ ރިޕޯޓުކޮށްފަ އެވެ.

އެމްއެމްއޭއިން މިއަދު ބޭއްވި ނޫސްވެރިންގެ ބައްދަލުވުމުގައި މުނައްވަރު ވިދާޅުވީ ޑްރާފްޓު ބިލެއް އެކުލަވާލީ މިހާރު ހަދާފައިވާ ގަވައިދަށް ގާނޫނީ ބާރުތަކެއް ދިނުމުގެ އިތުރުން ބޭރު ފައިސާ މާރުކުރުމުގެ މަސައްކަތް ވަކި ނިޒާމެއްގެ ތެރެއިން ހަރުދަނާ ގޮތަކަށް ކުރެވޭނެ އިންތިޒާމުތަކެއް ހަމަޖެއްސުމަށް ކަމަށެވެ. އެ ޑްރާފްޓު ބިލް، ގާނޫނަކަށް ވެގެން އަންނައިރު މިހާރު އޮތް ގަވައިދުގެ ތެރެއިން ޑޮލަރު މާރުކުރުމުގައި ލުއި ދީފައި ނުވާނެ ކަމަށް އޭނާ ވިދާޅުވި އެވެ.

”ހަގީގަތުގައި ގަވައިދަކަށް ނާދޭ އެއްވެސް ބަދަލެއް. ނޫސްތަކުން މިއަދު އެކަން އެވަނީ ވަރަށް ބޮޑަށް އޮޅުވާލާފައި،“ ގަވަރުނަރު ވިދާޅުވި އެވެ.

ކޮންމެ އަހަރަކު ޓޫރިޒަމް ދާއިރާއަށް އެތައް ބިލިއަން ޑޮލަރެއް ލިބުނު ނަމަވެސް އެމްއެމްއޭ އަހަރެއްގެ ތެރޭގައި ލިބެނީ ބިލިއަނެއްހާ ޑޮލަރު ކަމަށާއި އޭގެ ތެރެއިން 700 މިލިއަން ޑޮލަރު ދަނީ އަސާސީ ބޭނުންތަކަށް ކުރާ ހަރަދާއި ލޯނު ދެއްކުމަށް ކަމަށް އެމްއެމްއޭއިން ބުންޏެވެ.

މުނައްވަރު ވިދާޅުވީ އަސާސީ ހިދުމަތްތައް ދިނުން މެދުކެނޑުނަ ނުދިނުމަށްޓަކައި އެމްއެމްއޭ އަށް ޑޮލަރު ލިބޭނެ ގޮތަކެއް އޮންނަންޖެހޭ ކަމަށެވެ.

ބޭރު ފައިސާއާ ބެހޭ ބިލްގެ މުހިއްމު މައުލޫމާތުތައް ހިމެނޭހެން ހަދާފައިވާ ޕްރެޒެންޓޭޝަނެއްވެސް އެމްއެމްއޭ އިން މިއަދު ވަނީ ނޫސްވެރިންނާ ހިއްސާކޮށްފަ އެވެ.

ޕްރެޒެންޓޭޝަންގައި ހިއްސާކުރި މައުލޫމާތުގައިވާ ގޮތުން ކެޓަގަރީ ”އޭ“ ގައިވާ ރިސޯޓުތަކާއި ހޮޓާތަކާއި ޓޫރިސްޓް އުޅަނދުތަކަށް އަންނަ ކޮންމެ ފަތުރުވެރިޔަކު 500 ޑޮލަރުގެ ރޭޓުން ރާއްޖޭގެ ކޮންމެވެސް ބޭންކަކަށް މާރުކުރަންޖެހެ އެވެ. އަދި ކެޓަގަރީ ”ބީ“ގައި ހިމެނޭ ގެސްޓް ހައުސްތަކުން ކޮންމެ ފަތުރުވެރިޔެއްގެ ބޮލަކަށް 25 ޑޮލަރުގެ ރޭޓުން ރާއްޖޭެ ބޭންކަކަށް ޖަމާކުރަންޖެހެ އެވެ. ޑޮލަރު މާރުކުރަން މަޖުބޫރުކުރުމަށް ހަދާފައިވާ ގަވައިދުގައިވެސް އޮތީ އެގޮތަށެވެ.

ގަވައިދުގައި ނެތް ކަމެއްގެ ގޮތުގައި ބިލަށް ގެނައި މައިގަނޑު ބަދަލަކީ ޓޫރިޒަމް ދާއިރާގައި ހަރަކާތްތެރިވާ ފަރާތްތަކަށް އިންސާފުވެރިވުމުގެ ގޮތުން އިތުރު ކެޓަގަރީއެއް ބިލްގައި ހިމެނުން ކަމަށް ގަވަރުނަރު ވިދާޅުވި އެވެ. އެގޮތުން ބިލްގައި ވަނީ ޓޫރިޒަމް ދާއިރާގައި ނުހިމެނޭ ފަރާތްތަކަށްވެސް އަހަރަކު 20 މިލިއަން އެމެރިކާ ޑޮލަރަށް ވާ އަދަދަށް ބޭރު ފައިސާ ލިބޭ ނަމަ އެފަދަ ފަރާތްތަކުންވެސް އެގޮތަށް ލިބޭ ފައިސާގެ 25 ޕަސެންޓަށް ވުރެ ބޮޑު ނުވާ އަދަދެއް ރާއްޖޭގެ ބޭންކަކަށް ޖަމާކޮށް މާރުކުރަން ލާޒިމުކޮށްފައިވެ އެވެ.

4 Comments

  • Ahmed NAfiz ނޮވެމްބަރ 27, 2024

    Annehkaaves media ga bodu dhogeh hadhaalaafi, misarukaarun kon dhuvahaku thedheh hadhaanee, mee mi sarukaaruge hashee kasheega hifaafa hurikameh tha.

  • Eva Husi ނޮވެމްބަރ 27, 2024

    Kurin buni ehthi cancel 😂

  • Aminath Shiyaana ނޮވެމްބަރ 27, 2024

    Hahthahaaves vashafaru muizzu🤣

  • Ahmed Mahz ނޮވެމްބަރ 27, 2024

    Dhogu hadhaa vagunge gang eh..

Leave a Reply