ވަކިވަކި އިދާރާތަކުން އަލަށް ރިޓަޔާކުރާ މީހުންނަށް ކޮންމެ މަހަކު ދޭ އެލަވަންސް ހުއްޓާލަނީ

ފިނޭންސް މިނިސްޓްރީން ބުނީ ރާއްޖޭގައި ދަރިމައިވުމުގެ ރޭޓު އާބާދީ ރިޕްލޭސްކުރެވޭ ވަރަށްވުރެ ދަށަށް ގޮސް، ދިރިހުންނާނެ ކަމަށް އަންދާޒާކުރެވޭ އުމުރު މައްޗަށް ގޮސް، 65 އަހަރުން މަތީގެ މީހުން މަސައްކަތްކުރާ އުމުރުފުރާގެ މީހުންނަށް ބަރޯސާވާންޖެހޭ މިންވަރު ލަފާކުރާ މިންގަނޑު މުސްތަގުބަލުގައި މައްޗަށް ދާނެ ކަމަށް އަންދާޒާކުރެވޭ ކަމަށެވެ.

އެކަމުގެ ސަބަބުން ދައުލަތުގެ މުވައްޒަފުންނަށް ދޭ ރިޓަޔަމަންޓް އިނާޔަތް ދޭންޖެހޭ މުވައްޒަފުން ގިނަވެ، 65 އަހަރުން މަތީ އެންމެނަށް ދައުލަތުން ދޭ އިނާޔަތަށް ކުރަންޖެހޭ ހަރަދުތައް ހަލުވިކަމާއެކު ކުރިއަރާނެ ކަމަށްވެސް ބުންޏެވެ.

ފިނޭންސް މިނިސްޓްރީން ބުނީ، އަންނަ އަހަރު އުމުރުން ދުވަސްވީ މީހުންނަށް ދޭ ޕެންޝަނަށް 1.45 ބިލިއަން ރުފިޔާ އަދި ދައުލަތުގެ މުއައްސަސާތަކުން ރިޓަޔާވާ ފަރާތްތަކަށް ދައުލަތުގެ ބަޖެޓުން 325 މިލިއަން ރުފިޔާ ހަރަދުކުރަން ޖެހޭނެ ކަމަށް ލަފާކުރެވޭ ކަމަށެވެ.

އަދި ޕޭ ހާމަނައިޒޭޝަނާއެކު ރިޓަޔަމަންޓް އިނާޔަތް ދިނުމުގެ އުސޫލު ތަންފީޒު ނުކުރެވިއްޖެ ނަމަ 2055 ވަނަ އަހަރު ޖުމުލަ 7.89 ބިލިއަން ރުފިޔާ ނުވަތަ އެ އަހަރުގެ ނޮމިނަލް ޖީޑީޕީގެ 2.8 ޕަސެންޓާ އެއްވަރުގެ އަދަދެއް ޕެންޝަން ސްކީމަށް ދައުލަތުގެ ބަޖެޓުން ހަރަދުކުރަންޖެހޭނެ ކަމަށް އަންދާޒާކުރެވޭ ކަމަށްވެސް ބުންޏެވެ.

ފިނޭންސް މިނިސްޓްރީން ބުނީ، މި ހަރަދު ދެމެހެއްޓެނިވި ގޮތެއްގައި ދިނުމަށްޓަކައި އަންނަ އަހަރުގެ އޭޕްރިލް އިން ފެށިގެން ފޯރުންތެރިކަމަށް ބަލައި އެންމެ މަދުން އާމްދަނީ ލިބޭ މީހުންގެ ތެރެއިން 65 އަހަރު ވެފައިވާ މީހުންނަށް އެކަނި މުސްކުޅިންގެ އެލަވެންސް ދޭން ނިންމާފައިވާ ކަމަށެވެ.

އެ ބަދަލުގެ ސަބަބުން އުމުރުން ދުވަސްވީ މީހުންނަށް ދެމުންދާ ’ޔުނިވާސަލް ބޭސިކް ޕެންޝަން‘ ބަދަލުވެގެންދާނީ ’ޓާގެޓެޑް‘ ޕެންޝަންގެ އިނާޔަތަކަށް ކަމަށްވެސް ބުންޏެވެ. ނަމަވެސް އެންމެ މަދުން އާމްދަނީ ލިބޭ މީހުންގެ ގޮތުގައި ބަލާނީ އެންމެ މަތިން ކިހާ ވަރަކަށް ލިބޭ މީހުން ކަމެއް ބުނެފައެއް ނެތެވެ.

މީގެ އިތުރުން، ވަޒީފާއިން ރިޓަޔާވެގެން ލިބޭ ޕެންޝަނާއި ދައުލަތުން ދޭ އަސާސީ ޕެންޝަން ވެސް ލިބޭ މީހުން ގިނަވެ، ޑަބަލް ޕެންޝަންގެ މައްސަލަ ހައްލު ކުރުމަށް ގާނޫނަށް ގެންނަން ޖެހޭ ބަދަލުތައް ހުށަހަޅާނެ ކަމަށް ފިނޭންސް މިނިސްޓްރީން ބުނެފައިވެ އެވެ.