ލެޓްސް ކޮފީ މޯލްޑިވްސްއަށް ވަދެ މުވައްޒަފުންނަށް ބިރުދެއްކި ދެ މީހުން ހައްޔަރުކޮށްފި

ލެޓްސް ކޮފީ މޯލްޑިވްސްއަށް ވަދެ މުވައްޒަފުންނަށް ބިރުދެއްކި ދެ މީހުން ހައްޔަރުކޮށްފިއެވެ.

ލެޓްސް ކޮފީ މޯލްޑިވްސްއަށް ގެއްލުންދިން މައްސަލަ ފެންމަތިކޮށްފައި ވަނީ މީގެ ދުވަސްތަކެއް ކުރިން ސޯޝަލް މީޑިއާގައެވެ.

ފުލުހުން މިއަދު ބުނީ، ޑިސެމްބަރު 12 ވަނަ ދުވަހު ހަވީރީ ހިނގުމުގައި ހުންނަ އެތަނަށް ބަޔަކު ވަދެ ތޫނު ހަތިޔާރު ބޭނުންކޮށްގެން އެތަނުގެ މުވައްޒަފުންނަށް ބިރުދައްކައި، މުދަލަށް ގެއްލުން ދީފައިވާ މައްްސަލައާ ގުޅިގެން ދެ މީހަކު ހައްޔަރުކޮށްފައިވާ ކަމަށެވެ.

އެ މައްސަލައިގައި ހައްޔަރުކޮށްފައިވަނީ ގއ. ދެއްވަދޫ، ވައިލެޓްމާގެ، އަހުމަދު ތައުފީގު އަދި ބ. ތުޅާދޫ، މީޒާން، އަސަދުﷲ ހާތިމެވެ.

އެ ދެ މީހުން ހައްޔަރުކޮށްފައި ވަނީ ޑިސެމްބަރު 16 ވަނަ ދުވަހެވެ.

އެ މީހުންގެ ބަންދަށް ކޯޓުން ފަސް ދުވަސް ޖަހައިދީފައިވާ ކަމަށާއި މި މައްސަލަ ތަހުގީގު ކުރަމުންދާ ކަމަށް ފުލުހުން ބުންޏެވެ.