އަމާޒަކީ ފަތުރުވެރިކަމުން އަންނަ އަހަރު ފަސް ބިލިއަން ޑޮލަރު ހޯދުން: އެމްއެމްޕީއާރްސީ

ރާއްޖޭގެ ޓޫރިޒަމަށް މުހިންމު މާކެޓުތަކުގައި ރާއްޖެ އިޝްތިހާރު ކުރުމުގެ ގިނަ ހަރަކާތްތަކަކާ އެކު، އަންނަ އަހަރު ފަސް ބިލިއަން ޑޮލަރުގެ އާމްދަނީއެއް ފަތުރުވެރިކަމުން ހޯދުމަށް ސަރުކާރުން އަމާޒު ހިފައިފި އެވެ.

އެމްއެމްޕީއާރްސީ މިއަދު ބުނީ ރާއްޖެއަށް މިއަހަރު ދެމިލިއަން ފަތުރުވެރިން ޒިޔާރަތް ކުރިއިރު އެކަމުގެ އެ ކުންފުނިން އިސްނަގައިގެން ރާއްޖެ ޕްރޮމޯޓް ކުރުމަށް ކުރިއަށް ގެންދިޔަ ހަރަކާތްތައް މުހިންމު ދައުރެއް އަދާކުރި ކަމަށެވެ.

އެގޮތުން އެމްއެމްޕީއާރްސީން ވަނީ ތިން ފެއާ އަކާއި ރޯޑްޝޯ އާއި ސޯޝަލް މީޑިއާގެ 15 ކެމްޕޭން އަދި 23 ވާޗުއަލް އިވެންޓް ކުރިއަށް ގެންގޮސްފައި ކަަމަށް އެމްއެމްޕީއާރްސީޏް ބުންޏެވެ. އަދި މުހިންމު ގިނަ މާކެޓްތަކަކަށް ރާއްޖޭގެ ތަފާތު ތަޖުރިބާތައް ދައްކާލުމަށް ކުރިއަށް ގެންދިޔަ ’ޑިސްކަވާ މޯލްޑިވްސް‘ ވެބިނާ ސީރީޒް ހިމެނޭ ކަމަށް އެމްއެމްޕީއާރްސީން ބުންޏެވެ. ޗައިނާ ފަދަ މުހިންމު މާކެޓުތަކުގައި މި އަހަރު ސިމްޕޯސިއަމްތައް ބޭއްވި ކަމަށް ވެސް އެމްއެމްޕީއާރުސީން ބުންޏެވެ.

އަންނަ އަހަރު، ވިޒިޓް މޯލްޑިވްސް އިން އާ ސްޓްރެޓީޖިކް އެޕްރޯޗެއްގެ ދަށުން ވީޑިއޯ ޑިޖިޓަލް ކެމްޕޭންތަކަށް ސަމާލުކަމެއް ދީގެން ކޮންޓެންޓް އުފެއްދުމާއި ސަގާފީ ޓްރޭޑް ޝޯތަކުން އަމާޒު ބަދަލުކޮށް، ކޮންވާޝަން ޑްރައިވަން މާކެޓިން ހަރަކާތްތަކަށް ބަދަލުކުރުމަށް ނިންމައިފައިވާ ކަމަށް އެމްއެމްޕީއާރްސީން ބުންޏެވެ.

ރާއްޖޭ އިސްތިހާރު ކުރުމުގެ ގޮތުން އަންނަ އަހަރަށް ރާވާފައިވާ ހަރަކާތްތަކުގެ ތެރޭގައި ބްރޭންޑް މާޗަންޑައިޒް ވިއްކުމުގެ އާ ޕްލެޓްފޯމެއް ކަމަށްވާ ވިޒިޓް މޯލްޑިވްސް ޝޮޕް ލޯންޗުކުރުމާއި ވިޒިޓް މޯލްޑިވްސް ކަލަންޑަރުގެ ދަށުން ރާއްޖޭގައި ހިނގަމުންދާ ހުރިހާ އިވެންޓްތަކެއްގެ މައުލޫމާތުތައް ހިމަނައި ސެންޓްރަލައިޒްޑް ހަބެއް ގާއިމްކޮށް، ޓޫރިސްޓުންގެ ދަތުރުތައް ރޭވުމަށް ފަސޭހަ މަގެއް ހޯދައި ދިނުން ހިމެނޭ ކަމަށް އެމްއެމްޕީއާރްސީން ބުންޏެވެ.

މީގެ އިތުރުން، ވިޒިޓް މޯލްޑިވްސް އެކަޑަމީއެއް ގާއިމްކޮށް، ސިނާއަތުގެ އިލްމު އިތުރުކުރުމަށާއ، ޑެސްޓިނޭޝަން ސްޕެޝަލިސްޓް ސެޓްފިކެޓް ދިނުމަށް ފަރުމާކޮށްފައިވާ ތައުލީމީ ޕްރޮގްރާމްތައް ކުރިއަށް ގެންދާނެ ކަމަށް ވެސް އެމްއެމްޕީއާރުސީން ބުންޏެވެ.

އެމްއެމްޕީއާރުސީގެ އަންނަ އަހަރުގެ ޖުމްލަ އަމާޒަކ،ީ ހޫނު މޫސުމުގެ ބޮޑެތި ކެމްޕޭންތަކާއެކު 25 މާކެޓުގައި ކޮންމެ ކުއާޓަރެއްގައި ވެސް ހަރަކާތްތައް ކުރިއަށް ގެންދިއުމެވެ.

ސަރުކާރުގެ އަމާޒަކީ އަންނަ އަހަރު 2.2 މިލިއަން ޓޫރިސްޓުން ގެންނައުމެވެ،