ރާއްޖެ އާއި ޗައިނާގެ މިނިވަން ވިޔަފާރީގެ އެއްބަސްވުމުގައި ސޮއިކުރީ ކުރީގެ ރައީސް އަބްދުﷲ ޔާމީންގެ ވެރިކަމުގައި އެމަނިކުފާނު ޗައިނާއަށް ކުރެއްވި ދަތުރުފުޅުގައި ޑިސެމްބަރު، 2014 ގަ އެވެ. އެ އެއްބަސްވުމަށް ރައްޔިތުންގެ މަޖިލީހުގެ 18 ވަނަ ދައުރުގައި ވަނީ ރުހުން ދީފަ އެވެ. އެއިރު އޮތީ ޕީޕީއެމްގެ މެޖޯރިޓީ އޮންނަ މަޖިލީހެކެވެ.

މިނިވަން ވިޔަފާރީގެ އެއްބަސްވުމަށް އަމަލުކުރަން ފަށަން ތައްޔާރު ވެފައިވާކަން އިއުލާންކުރީ ޗައިނާގެ ކޮމާސް މިނިސްޓަރު ވަންގް ވެންޓާއޯ އާއި ރާއްޖޭގެ އިކޮނޮމިކް މިނިސްޓަރު މުހައްމަދު ސައީދު މިއަދު ބައިވެރިވެރިވެވަޑައިގަތް އޮންލައިން ރަސްމިއްޔާތެއްގަ އެވެ.

އެ ރަސްމިއްޔާތުގައި  ވަންގް ވެންޓާއޯ ވިދާޅުވީ ޗައިނާ އާއި ރާއްޖެއަކީ ޒަމާނުއްސުރެ ގާތް ދެ ގައުމު ކަމަށާއި ފާއިތުވި އަހަރުތަކުގައި އިގްތިސާދީ ގުޅުން ވެސް ވަރަށް ބޮޑަށް ބަދަހިވެފައިވާ ކަމަށެވެ،  ޗައިނާ އާއި ރާއްޖޭގެ މިނިވަން ވިޔަފާރީގެ އެއްބަސްވުމާ ގުޅިގެން ދެ ގައުމުން ވެސް ވާންޖެހޭ ހުރިހާ ތައްޔާރީތަކެއް ވެފައިވާ ކަމަށް ވެސް ވިދާޅުވި އެވެ.