ހުރިހާ ސްކޫލެއް އޭސީކުރުމުގެ މަޝްރޫއު ސެޕްޓެމްބަރު މަހުގެ ނިޔަލަށް ނިންމާނަން: ރައީސް

އިއާދަކުރަނިވި ހަކަތައިގެ ނިޒާމު ބޭނުންކޮށްގެން ސެޕްޓެމްބަރު މަހުގެ ނިޔަލަށް ރާއްޖޭގެ ހުރިހާ ސްކޫލެއް އޭސީކުރާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ ރ.ހުޅުދުއްފާރު ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ. އެ ވާހަކަފުޅުގައި ރައީސް ވިދާޅުވީ ހޫނުގަދަ ރަށްރަށުގައި ސްކޫލްތައް ފިނިކުރެވެންޖެހޭކަމަށާއި، އެކަމަށް މަޝްރޫއެއް ފަށްޓަވާފައިވާކަން ފާހަގަކުރައްވައި ރައީސް ވިދާޅުވީ އެ މަޝްރޫއު ހިންގާނީ އިއާދަކުރަނިވި ހަކަތައިންކަން ކަމަށެވެ. ރައީސް ވިދާޅުވީ އެމަޝްރޫއަށް ރަނގަޅު ކުރިއެރުމެއް ލިބިފައިވާކަމަށާއި، މިއަހަރުތެރޭގައި ހުޅުދުއްފާރު ހިމެނޭހެން ރާއްޖޭގެ ހުރިހާ ރަށެއްގެ ސްކޫލްތައް އިއާދަކުރަނިވި ހަކަތަ ބޭނުންކޮށްގެން އޭސީ ކުރައްވާނެކަމަށެވެ.

ސަރުކާރުން މަސައްކަތް ކުރަމުން ދަނީ ސެޕްޓެމްބަރު މަހުގެ ކުރިން އެ މަޝްރޫއު ނިންމުމަށް ކަމަށް ރައީސް ވިދާޅުވި އެވެ.

ކުރީ ސަރުކާރުގައި ފަށައި، ހުއްޓިފައިވާ މަޝްރޫއުތަކެއް އެބަހުރިކަމަށާއި، އެކަންކަމަށް މި ސަރުކާރުން ހައްލު ހޯދަމުން އަންނަ ކަމަށެވެ.

”މިސާލަކަށް މިރަށުގެ ގިރާ ސަރަހައްދު ހިމާޔަތްކުރުމަށް އެމްޓީސީސީއާ ހަވާލުކޮށްފައިވާ މަޝްރޫއަކީ ބޮޑުހިލަ ސަޕްލައި ކުރުމުގައި ދަތިތަކެއްހުރުމުން ހުއްޓެން ދިމާވިކަމެއް. އެކަމަށް ހައްލެއް ހޯދައިފިން. އެކަމަށް ޝެޑިއުލެއްގެތެރޭން މިރަށްވެސް ހިމެނޭހެން ބޮޑުހިލަ ޖެހުމުގެ މަސައްކަތް ރާއްޖޭގެ ހުރިހާ ރަށެއްގައިވެސް ހިނގައިގަންނާނެ. ބޮޑުހިލަ ސަޕްލައިކުރެވޭނެ ގޮތްތަކެއް ސަރުކާރުގެތެރޭން ވާނީ ކަނޑައަޅާފައި. ހައްލުތަކެއް ހޯދިއްޖެ. މިރަށުގެ ގިރާ ސަރަހައްދުގެ މަސައްކަތާއި ބޮޑުހިލަ ނެތުމުން ކުރިއަށް ނުގޮސްހުރި މަޝްރޫއުތައް ވަރަށް އަވަހަށް ކުރިއަށްދާނެ. މަޝްރޫއިތައް މޮބިލައިޒްކުރެވި ވަރަށް އަވަހަށް ފަށައިގަނެވޭނެ“. ރައީސް ވިދާޅުވިއެވެ.

ރައީސް ވިދާޅުވީ މިއަހަރުގެ ބަޖެޓުން ހުޅުދުއްފާރުގެ ބަނދަރުގެ މަރާމާތާއެކު ބޭރު ތޮށިވެސް ބޭނުންކުރެވޭގޮށް ހަދައިދޭނެ ކަމަށެވެ. އަދި ރަށުގެ ސްކޫލުގެ ޖާގައިގެ މައްސަލައަށް ވެސް ހައްލު ބޭނުންވާކަން ފާހަގަކުރައްވައި ރައީސް ވިދާޅުވީ ސްކޫލަށް ޖާގަ އިތުރުކުރުމަށް ފަށާފައިވާ މަޝްރޫއު ކުރިއަށް ނުގޮސްއޮތުމުގެ ކަންބޮޑުވުން އެބައޮތް ކަމަށެވެ.

ހުޅުދުއްފާރު ސްކޫލަށް 12 ކްލާސް ރޫމް އިތުރުކުރުމުގެ މަޝްރޫއި ކޮންޓްރެކްޓަރަށް ކުރިއަށް ގެންދެވޭނެގޮތް ހަދައި އެ މައްސަލަ ހައްލުކޮށްދެއްވާނެކަމަށް ރައީސް ވިދާޅުވި އެވެ، އަދި ސްކޫލަށް އޮފީސް ޖާގަ އިތުރުކޮށް އެނޫންވެސް ވަސީލަތްތައް ހޯއްދަވައިދެއްވާނެކަމަށްވެސް ރައީސް ވިދާޅުވިއެވެ.

”އަޅުގަނޑު ގަބޫލުކުރާ ސިޔާސަތަކީ އިމާރާތެއްގެ އިތުރުން ގައުމަށް ތަރައްގީ ގެނެވޭނީ ޒުވާން ޖީލަށް ތައުލީމާއި ތަރުބިއްޔަތު ދީގެން. އެހެންކަމުން ސްކޫލަށް ވަސީލަތް ހޯދައިދިނުމަކީ ވަށައިޖެހޭ ތަރައްގީ. ހިތްހަމަ ޖެހޭ މާހައުލެއް ގާއިމްކުރުމަކީ އޭގެ އުފާވެރިކަން ލިބޭނެކަމެއް. އެހެންކަމުން ސްކޫލަކަށް ބޭނުންވާ އިންފްރާސްޓްރަކްޗާއާއި އެނޫންވެސް ވަސީލަތް ގާއިމްކޮށް ތައުލީމީ ދާއިރާއަށް އަޅުގަނޑު ވަރަށް އިސްކަންދެން އިރާދަކުރެއްވިއްޔާ އެކަންކަންވާނެ“. ރައީސް ވިދާޅުވިއެވެ.