ލަންކާގެ ކޯޓެއްގެ ތެރޭ ބަޑިޖަހައި ގޭންގު ލީޑަރަކު މަރާލައިފި، ބަޑިޖެހި މީހާ ހުރީ ލޯޔަރަކަށް ވެގެން

ސްރީ ލަންކާގެ ކޯޓެއްގެ ތެރޭގައި އެ ގައުމުގެ ނުރައްކާތެރި ގޭންގު ލީޑަރު އަދި ޑްރަގް ބޮޑެއްގެ ގަޔަށް ބަޑި ޖަހައި އޭނާ މަރާލައިފި އެވެ.

ނަވާރަ މީހުން މަރާލާފައިވާ ކަމަށް ތުހުމަތުވާ ސަންޖީވާ ކުމަރަ ސަމަރަރަތްނަ ނުވަތަ ލަންކާގައި މަޝްހޫރު ނަމުން ނަމަ ގަނެމުއްލާ ސަންޖީވާގެ ގަޔަށް ބަޑި ޖަހައި މަރަލީ އޭނާގެ މައްޗަށް ކުރާ ދައުވާގެ ޝަރީއަތަށް ފުލުހުންގެ ބެލުމުގެ ދަށުން އިއްޔެ ކޯޓަށް ހާޒިރުކޮށްފައި ހުއްޓަ އެވެ.

ލަންކާގެ ނޫސްތަކުން ބުނާ ގޮތުން ސަންޖީވާގެ ގަޔަށް ބަޑި ޖެހި މީހާ ކޯޓު ތެރެއަށް ވަދެފައިވަނީ ލޯޔަރަކަށް ވެގެންނެވެ.

އެ ހާދިސާގައި ބަޑި ޖެހުމަށްފަހު އެކަން ކުރި މީހާ ފިލައިގެން އުޅެނިކޮށް ލަންކާގެ ސްޕެޝަލް ޓާކްސް ފޯސް އިން ވަނީ އޭނާ ހައްޔަރުކޮށްފަ އެވެ. އެއީ މުހައްމަދު އަޒްމަން ޝަރީފުއްދީން ނަމަކަށް ކިޔާ 34 އަހަރުގެ މީހެކެވެ.

ލަންކާގެ ފުލުހުން ބުނާ ގޮތުން ބަޑި ޖެހި މީހާއަށް އަންހެނަކު އެހީތެރިވެ ދީފައިވެ އެވެ. ނެގަމްބޯއަށް ނިސްބަތްވާ ޑުރަގް ބޮޑެއް ކަމަށް ތުހުމަތުވަ އެ އަންހެން މީހާ ކޯޓު ތެރެއަށް ވަދެފައިވަނީ ލޯޔަރަކަށް ވެގެން ކަމަށާއި ބަޑި ޖެހި މީހާއަށް ބަޑި ފޯރުކޮށްދިނީ އެ އަންހެން މީހާ ކަމަށްވެސް ފުލުހުން ތުހުމަތު ކުރެ އެވެ.

އެ އަންހެން މީހާ އަދި ހައްޔަރުކޮށްފައި ނުވާއިރު, ނޫސްތަކުން ބުނާ ގޮތުން އެ އަންހެން މީހާ ކޯޓު ތެރެއަށް ބަޑި ވައްދާފައިވަނީ ފޮތެއްގެ އެތެރެ ބަޑީގެ ސައިޒަށް ކަފައިގެން އެ ފޮތް ތެރޭގައި ފޮރުވައިގެންނެވެ.