ނޭޝަނަލް ސާވިސް ޕްރޮގްރާމްގައި ބައިވެރިވާން ހުޅުވާލައިފި

މޯލްޑިވްސް ނޭޝަނަލް ސާވިސްގައި ބައިވެރިވުމަށް ޝައުގުވެރިވާ ޒުވާނުން އެ ކަމަށް އެދި ހުށަހެޅުމުގެ ފުރުސަތު މިރޭ ހުޅުވާލައިފި އެވެ.

ޑިފެންސް މިނިސްޓްރީން މިރޭކުރި އިއުލާނެއްގައި ބުނީ އެ ހިދުމަތުގައި ބައިވެރިވުމަށް ކުރިމަތިލެވޭނީ، އުމުރުން 16 އަހަރާއި 28 އަހަރާއި ދެމެދުގެ ޒުވާނުންނަށް ކަމަށެވެ. ޕްރޮގްރާމްގައި ބައިވެރިވުމަށް ޝައުގުވެރިވާ ފަރާތްތަކުގެ މެޑިކަލް ޓެސްޓެއް ވެސް ހަދާނެ ކަމަށް ޑިފެންސުން ބުންޏެވެ.

މި ޚިދުމަތުގައި ބައިވެރިވާން އެދޭ ފަރާތްތަކުން ”ދިވެހިރާއްޖޭގެ ގައުމީ ޚިދުމަތުގައި ބައިވެރިވުމަށް އެދޭ ފޯމް“ ފުރިހަމަ ކުރުމަށްފަހު، ހުށަހަޅަންޖެހޭނީ އީމެއިލް މެދިވެރިކޮށް ނުވަތަ ޑިފެންސް މިނިސްޓްރީގެ ރިސެޕްޝަނަށެވެ.

މި ފޯމު، މިނިސްޓްރީ އޮފް ޑިފެންސްގެ ވެބްސައިޓުން ޑައުންލޯޑް ކުރެވޭނެއެވެ.

މި ޕްރޮގްރާމުގެ ފުރަތަމަ ބުރުގައި ބައިވެރިވުމަށް އެދޭ ފޯމު ހުށަހެޅުމުގެ ސުންގަޑިއަކީ އެކެއް ޖޫން 2025ގެ މެންދުރު 12:00ގެ ނިޔަލެވެ.

އެ ޕްރޮގްރާމަކީ ރައީސް ޑރ. މުހައްމަދު މުއިއްޒުގެ އިސްނެންގެވުމުގެ ދަށުން ކުރިއަށް ގެންދާ ޕްރޮގްރާމެކެވެ.