ބާރުބޮޑުވުމުގެ ސަބަބުން ޕޯސްޓު އޮފީހުުގެ ވަޒީފާއަށް މީހުން ހޯދަން އިއުލާންކޮށްފި

ބޭރުގެ އޮންލައިން ޕްލެޓްފޯމްތަކުން ގިނަ ބަޔަކު ވިޔަފާރިކުރަމުން ދިއުމުގެ ސަބަބުން ޕޯސްޓް އޮފީހަށް ބާރުބޮޑުވެ، ވަޒީފާއަށް މީހުން ހޯދަން އިއުލާންކޮށްފި އެވެ.

ޕޯސްޓް އޮފީހަށް ބާރު ބޮޑުވެ އެތަނުގެ ވަޒީފާތަކަށް މީހުން ހޯދަން ފެށީ ދިވެހިން މެދުގައި ޗައިނާގެ ޓެމޫ މަގުބޫލުވެ ގިނަ ބަޔަކު އެ ޕްލެޓްފޯމުން ވިޔަފާރިކުރަން ފެށުމާ ގުޅިގެންނެވެ.

ޓެމޫ އިން އޯޑަރު ކުރާ އެއްޗެހި ހަފުތާއެއްހާ ދުވަހުގެ ތެރޭގައި ލިބެ އެވެ. ނަމަވެސް ޕޯސްޓް އޮފީހަށް ބާރުބޮޑުވެ، މުދާ ކަސްޓަމަރުންނާ ހަމައަށް ލިބުން މިހާރު ވަނީ ވަރަށް ބޮޑަށް ލަސްވެފަ އެވެ. އެހެންވެ އާއްމުންގެ ޝަކުވާތައް ގިނަވުމާއެކު ޕޯސްޓުން މިހާރު ވަނީ ވަޒީފާއަށް މީހުން ހޯދުމަށް އިއުލާންކޮށްފަ އެވެ.

ޕޯސްޓު އޮފީހުން ވަނީ މިދިޔަ ދިހަ ދުވަހުގެ ތެރޭގައި ދިހަ ވަޒީފާއަށް އިއުލާންކޮށްފަ އެވެ. އެ ވަޒީފާތަކުގެ ތެރޭގައި ޕޯސްޓްމަނުންގެ ވަޒީފާ އާއި ސޭލްސް އޮފިސަރާއި މެއިލް ކްލިއާ ކުރުން ފަދަ ވަޒީފާތައް ހިމެނެ އެވެ.