ރާއްޖޭގައި ޓޫރިސްޓުން ހޭދަކުރާ ދުވަހުގެ އަދަދު 12 ޕަސެންޓު ދަށަށް

މި އަހަރުގެ މޭ މަހުގެ ނިޔަލަށް ރާއްޖެ ޒިޔާރަތްކުރި ޓޫރިސްޓުންގެ އަދަދު އިތުރުވި ނަމަވެސް ބެޑްނައިޓްސް، ފަތުރުވެރިން ހޭދަކުރި ރޭގެ އަދަދު ދަށަށް ހިނގައްޖެ އެވެ.

އެމްއެމްއޭއިން އާންމުކޮށްފައިވާ ތަފާސްހިސާބުގައިވާ ގޮތުން މި އަހަރުގެ ޖެނުއަރީ މަހުން ފެށިގެން މިދިޔަ މޭ މަހުގެ ނިޔަލަށް ޓޫރިސްޓުން އެވްރެޖުކޮށް ރާއްޖޭގައި ހޭދަކުރަނީ 6.8 ދުވަހެވެ.

މިދިޔަ އަހަރުގެ އެ މުއްދަތުގައި ރާއްޖޭގައި ޓޫރިސްޓުން 7.7 ދުވަސް ހޭދަކުރި ކަމަށް ތަފާސްހިސާބުގައިވެ އެވެ.

މި އަހަރުގެ މޭ މަހު ރިސޯޓުތަކުގެ ބެޑްނައިޓްސް ވަނީ ދަށަށް ގޮސްފަ އެވެ.

ނަމަވެސް ގެސްޓްހައުސްތަކުގެ ބެޑްނައިޓްސް މި މުއްދަތުގައި ވަނީ އިތުރުވެފައި ކަމަށް ތަފާސް ހިސާބުތަކުން ދައްކަ އެވެ.