ނުރައްކާތެރި އެކްސިޑެންޓެއް، އެކަކު މަރުވެ ދެ މީހެއްގެ ހާލު ސީރިއަސް

މާލޭގައި ނުރައްކާތެރި އެކްސިޑެންޓެއް ހިނގައި، އެކަކު މަރުވެެއްޖެ އެވެ.

އެ އެކްސިޑެންޓް ހިނގަން މެދުވެރިވީ މާފަންނު ބަސް ޓާމިނަލް ކުރިމަތީގައި އޮންނަ ކަފިހި ހުރަހުން މީހަކު ހުރަސް ކުރަނިކޮށް ސައިކަލުން އައިސް އޭނާގެ ގައިގައި ޖެހުމުންނެވެ. ސައިކަލު ދުއްވާފައި އައި ބާރުމިނުގެ ސަބަބުން މަގު ހުރަސްކުރި މީހާގެ ގައިގައި ޖެހި، އޭނާ ވިއްސައިގެން ދިޔައިރު ސައިކަލު ގޮސް ޖެހުނީ ލޮރީއެއްގެ ކުރިމައްޗަށެވެ.

ފުލުހުން މައުލޫމާތު ދޭ ގޮތުގައި އެކްސިޑެންޓުގައި މަރުވީ ސައިކަލު ދުއްވަން އިން 17 އަހަރުގެ ކުއްޖެކެވެ.

އެކްސިޑެންޓުގައި ދެން ޒަހަމްވީ އުމުރުން 16 އަހަރުގެ ކުއްޖަކަށާއި އުމުރުން 40 އަހަރުގެ މީހަކަށެވެ. އެ ދެ މީހުންގެ ހާލުވެސް ސީރިއަސް ކަމަށް ފުލުހުން މައުލޫމާތުދެ އެވެ.