އާ ޓާމިނަލް ހުޅުވާ ރަސްމިއްޔާތުގައި މާލޭ ވަށައިގެން ހަވާ އަރުވާނެ 

ވެލާނާ އިންޓަނޭޝަނަލް އެއާޕޯޓް (ވީއައިއޭ)ގެ އާ ޓާމިނަލް ހުޅުވާ ރަސްމިއްޔާތުގައި މާލެ ވަށައިގެން ހަވާ އެރުވުމަށް ހަމަޖެހިފައިވާކަމަށް އެމްއެންޑީއެފުން ބުނެފި އެވެ.

އާ ޓާމިނަލް ހުޅުވުމުގެ ރަސްމިއްޔާތުގެ ބޭއްވުމަށް ހަމަޖެހިފައިވަނީ މާދަމާ ރޭއެވެ.

ވީއައިއޭގެ އޮޕަރޭޓާ އެމްއޭސީއެލުން ބުނެފައިވަނީ އެ ރަސްމިއްޔާތުގައި ކުލަގަދަކޮށް ފާހަގަ ކުރަން ނިންމާފައިވާއިރު، ތާރީހީ ފެންވަރަށް ހަވާ އެރުވުމާއެކު ހާއްސަ ޝޯތަކެއް ވެސް އޮންނާނެ ކަމަށެވެ.

އެމްއެންޑީއެފުން މިރޭ ވިދާޅުވީ، އާ ޓާމިނަލް ހުޅުވުމުގެ ރަސްމިއްޔާތުގައި މާލޭގެ ވަށައިގެންވާ ކަނޑުގެ 16 ސަރަހައްދެއްގައި، އަދި އެއާޕޯޓް ކައިރިން 3 ސަރަހައްދެއްގައި މާދަމާ ރޭ ހަވާ އަރުވާނެ ކަމަށެވެ.

ހަވާ އަރުވާނީ މާދަމާ ރޭ 20:30 ހާއިރު، 6 މިނެޓް ވަންދެން ކަމަށް ވެސް އެމްއެންޑީއެފުން ބުންޏެވެ.