ކުޑަ ކުއްޖަކު ރޭޕްކުރި ދެ ފިރިހެނަކަށް 7 އަހަރު ފަހުން ހުކުމްކޮށްފި

މީގެ ހަތް އަހަރު ކުރިން މާލޭގައި ކުޑަ އަންހެން ކުއްޖަކު ރޭޕް ކުރި ދެ ފިރިހެނަކަށް ހުކުމްކޮށްފި އެވެ.

މި މައްސަލައަކީ 2018 ވަނަ އަހަރުގެ މެދު ތެރޭގައި މާލޭ ރަސްމީ ބޯޅަދަނޑު ހުންނަ ސަރަހައްދުގައި ހިނގި ހާދިސާއެކެވެ. އެ ހާދިސާއާ ގުޅިގެން އެކަން ކުރި މީހުން ހޯދަން އޭރު މާލޭގެ ބައެއް ގުރޫޕްތައްވެސް ނުކުތެވެ. އެކަމާއި ގުޅިގެން އެ މައްސަލައިގައި ހިމެނޭ ދެ މީހުން ފުލުހުންނާ ހަވާލުވީ އަމިއްލައަށް ކަމަށް ރެކޯޑްތައް ދައްކަ އެވެ.

މި މައްސަލައިގައި ހައްޔަރުކުރި ދެ މީހުންގެ މައްޗަށް ދައުލަތުން އުފުލާފައިވަނީ ރޭޕު ކުރުމުގެ ކުށުގެ ދައުވާ އެވެ. މިއީ ކުޑަ ކުއްޖަކަށް އަނިޔާއެއް ލިބުނު ކޭސްއެއް ކަމުން މައްސަލަ ކޯޓުގައި ކުރިއަށް ގެންދިޔައީ އާންމުކޮށް ހުޅުވައި ނުލަ އެވެ. އެހެންކަމުން ޝަރީއަތުގެ މަރުހަލާގައި މައްސަލައިގެ މާގިނަ ތަފުސީލެއް އާންމުވެފައެއް ނުވެ އެވެ.

މި މައްސަލައިގައި ހުކުމް ކޮށްފައިވަނީ މިދިޔަ ހަފުތާގަ އެވެ.