ޝީ ޖިންޕިންއާ ރައީސް ބައްދަލުކުރައްވައިފި، މަޝްވަރާކުރީ ގުޅުން ހަރުދަނާކުރަން

ޝަންހާއީ ކޯޕަރޭޝަން އޯގަނައިޒޭޝަން (އެސްސީއޯ) ސަމިޓުގައި ބައިވެރިވެވަޑައިގަތުމަށްމ ޗައިނާގެ ރައީސް ޝީ ޖިންޕިންގެ ދައުވަތަކަށް ރައީސް ޑރ. މުހައްމަދު މުއިއްޒު މިހާރު ޗައިނާއަށް ކުރައްވަމުން ގެންދަވާ ދަތުރުފުޅުގެ ތެރެއިން ޝީޖިން ޕިންއާ ބައްދަލުކުރައްވައި، ދެ ގައުމުގެ ގުޅުން ހަރުދަނާކުރުމުގެ ގޮތުން މަޝްވަރާކުރައްވައިފި އެވެ.

މިދިޔަ ހުކުރު ދުވަހުގެ ރޭ ރައީސް ވަނީ ޗައިނާއަށް ފުރާވަޑައިގެންފައެވެ. ޗައިނާއިން އެ މަނިކުފަނަށް ރަސްމީކޮށް މަރުހަބާ ކިޔައިފައިވަނީ އިއްޔެއެވެ.

ރައީސް މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ ޝީ ޖިންޕިންއާ މިއަދު ބައްދަލުކުރައްވައި ކުރިއަށް އެކުގައި މަސައްކަތް ކުރަން ހުރި ކަންކަމާ ގުޅޭ ގޮތުންނާއި، މިހާރު އެއްބާރުލުން ދެމުން އަންނަ ދާއިރާތަކުން އިތުރަށް ގުޅުން ބަދަހިކުރެވިދާނެ ގޮތްތަކާމެދު މަޝްވަރާ ކުރައްވާފައިވާނެ ކަމަށެވެ.

ރާއްޖެއާއި ޗައިނާއާ ދެމެދު އޮތް ގުޅުމަކީ ޒަމާންވީ ގާތް ރަހުމަތްތެރިކަމާއި އެއްގައުމު އަނެއް ގައުމަށް އެދޭ ހެޔޮކަމުގެ މައްޗަށް އެކުލެވިގެންވާ ގުޅުމެއް ކަމަށާއި 2028ވަނަ އަހަރާ ހަމައަށް އެކުލަވައިލައިފައިވާ ޗައިނާ މޯލްޑިވްސް ކޮމްޕްރެހެންސިވް ސްޓްރެޓެޖިކް ކޯޕަރޭޓިވް ޕާޓްނާޝިޕްގެ ދަށުން، ދެ ގައުމުގެ ރައްޔިތުންނަށް ވެސް ފައިދާވާނެހެން ގުޅުން ބަދަހިވާނެ ކަމަށް ރައީސް ވިދާޅުވި އެވެ.