ހުޅުމާލެއިން ރޭ ކަރަންޓް ކެނޑުނީ ސަބް ސްޓޭޝަނަކަށް ބަޔަކު ގެއްލުންދޭން އުޅުމުން!

ހުލުމާލެ ފޭސް 2ގެ ބައެއް ސަރަހައްދުތަކުން ރޭ ކަރަންޓު ކެނޑުނީ ސަބްސްޓޭޝަނަކަށް ބަޔަކު ގެއްލުން ދޭން މަސައްކަތް ކުރުމުން ކަމަށް ސްޓެލްކޯ އިން ބުނެފި އެވެ.

ހުޅުމާލޭގެ ދެވަނަ ފިޔަވަހީގެ ވިނަރެސް އަދި ހިޔާގެ ބައެއް ޓަވަރުތަކުންނާއި އެމްޕީއެލް ޓަވަރުތަކުން ކަރަންޓުގެ ހިދުމަތް މެދުކެނޑުނީ ރޭ ދަންވަރު 3:30 ހާއިރެވެ. ކަރަންޓު އަނބުރާ ލިބުނީ ފަތިހު 4:56 ހާއިރެވެ.

އެކަމުގެ ތަފުސީލު ދެމުން ސްޓެލްކޯ އިން މިއަދު ބުނީ، އެ ސަރަހައްދުތަކުން ކަރަންޓު ކެނޑުނީ ހުޅުމާލޭ ދެވަނަ ފިޔަވަހީގެ ސަބްސްޓޭޝަނަކަށް ބަޔަކު ގެއްލުން ދޭން އުޅުމުގެ ތެރޭގައި ނެޓްވޯކް ފީޑަރެއްގެ ބައެއް އޮފްވެގެން ކަމަށެވެ.

މި ސަބްސްޓޭޝަނަށް ގެއްލުންދިން މައްސަލަ ކަމާ ބެހޭ ފަރާތަށް ހުށަހަޅާ މިފަދަ ހާދިސާތައް ތަކުރާރުވިޔަ ނުދިނުމަށް ކަމާބެހޭ ފަރާތްތަކުގެ ސަމާލުކަމަށް ގެނައުމަށް ސްޓެލްކޯ އިން މަސައްކަތްކުރަމުން އަންނަ ކަމަށްވެސް ބުންޏެވެ.

ސްޓެލްކޯ އިން ވަނީ މުޖުތަމައުގެ ގިނަ ބަޔަކަށް ތަކުލީފަކަށްވާ އަދި އަމިއްލަ ފުރާނައަށްވެސް ނުރައްކާތެރި މިފަދަ އަމަލުތައް ހިންގާ ފަރާތްތަށް ހުއްޓުވުމަށާއި ތަކުރާރުވިޔަ ނުދިނުމަށްޓަކައި، މިފަދަ ކަންކަން ކުރާ ފަރާތްތަކުގެ މައުލޫމާތު ކަމާބެހޭ ފަރާތްތަކާ ހިއްސާކުރަމުން ގެންދިއުމަށް އެދިފަ އެވެ.