ބާރު ސްޕީޑުގައި އައި ސައިކަލު ޖެހުނީ ކުއްޖާގެ ގައިގައި، ސައިކަލު ދުއްވި މީހާ މަޑެއް ނުކުރި!

ތިނަދޫ ސިޓީގައި ބާރު ދުވެލީގައި ދުއްވާފައި އައި ސައިކަލަކުން ޖެހި، ކުޑަކުއްޖަކަށް އިއްޔެ އަނިޔާވެއްޖެ އެވެ.

ފުލުހުން މިއަދު ބުނީ، އިއްޔެ އިރުއޮއްސި 6:16 އެހާކަންހާއިރު އެ އެކްސިޑެންޓް ހިނގީ ތިނަދޫ އާބާދީ ހިނގުމުގައި ހުނޅަގުން އިރަށް ބާރު ސްޕީޑެއްގައި ދުއްވާފައި ދިޔަ ސައިކަލެއް ދުވެފައި މަގު ހުރަސްކުރި ހަ އަހަރުގެ ކުއްޖެއްގެ ގައިގައި ޖެހިގެން ކަމަށެވެ.

އެ އެކްސިޑެންޓުގައި އަނިޔާވި ކުއްޖާއަށް ޑރ. އަބްދުލް ސަމަދް މެމޯރިއަލް ހޮސްޕިޓަލުގައި ފަރުވާދެމުންދާއިރު، އެ ހޮސްޕިޓަލުން ބުނީ ކުއްޖާއަށް އެއްވެސް ސީރިއަސް އަނިޔާއެއް ނުލިބޭ ކަމަށެވެ. އެ ކުއްޖާގެ ހާލު ސްޓޭބަލް ކަމަށާއި ކުއްޖާއަށް މިހާރު ފަރުވާ ދެމުންދަނީ ވޯޑުގައި ކަމަށްވެސް ބުންޏެވެ.