މައިމީހާގެ ފަރާތުން ދަރިފުޅަށް އެޗް.އައި.ވީ އަދި ސިފިލިސް ފެތުރުން ހުއްޓުވި ވިލާތުގެ އިއްތިހާދުގެ ފުރަތަމަ ގައުމަކަށް ޑެންމާކް ވެއްޖެއެވެ.ދުނިޔޭގެ ސިއްހަތު ޖަމްއިއްޔާ އިން މިކަން އިއުލާން ކޮށްފައިވަނީ ހުސްވި ފެބްރުއަރީމަހުގެ27 ވަނަ ދުވަހުއެވެ.
މި ނިންމުމާއިއެކު މައިމީހާގެ ފަރާތުން ދަރިފުޅަށް އެޗް.އައި.ވީ، ސިފިލިސް، ނުވަތަ ހެޕަޓައިޓިސް ބީ ފެތުރުން ނައްތާލާފައިވާކަމުގެ ރަސްމީ ސަނަދު ލިބިފައިވާ 22 ގައުމާއި ސަރަހައްދުތަކުގެ ލިސްޓުގައި ޑެންމާކް ވަނީ ހިމެނިފައެވެ.
ޑަބްލިޔުއެޗްއޯގެ މި ސަނަދު ދީފައިވަނީ 2025 ވަނަ އަހަރު ޑަބްލިޔު.އެޗް.އޯގެ ރީޖަނަލް ވެލިޑޭޝަން ކޮމިޓީ އާއި ގްލޯބަލް ވެލިޑޭޝަން އެޑްވައިޒަރީ ކޮމިޓީން ކުރި ދިރާސާތަކަށް ފަހުގައެވެ. މި ދިރާސާތަކުން ކަށަވަރުވި ގޮތުގައި ޑެންމާކުން ވަނީ ބަލި ފެތުރޭ މިންވަރު ދަށްކުރުމާއި، މާބަނޑު މީހުން ޓެސްޓުކުރުމާއި ފަރުވާ ދިނުމުގައި ކަނޑައެޅިފައިވާ ބައިނަލްއަގުވާމީ ލަނޑުދަނޑިތައް ދެމެހެއްޓެނިވި ގޮތެއްގައި ހާސިލުކޮށްފައެވެ.
ދުނިޔޭގެ ސިއްހަތު ޖަމްއިއްޔާގެ ޑިރެކްޓަރ ޖެނެރަލް ޑރ. ޓެޑްރޯސް އަދަނޮމް ގެބްރިއޭސަސް ވިދާޅުވި ގޮތުގައި، މައިމީހާގެ ފަރާތުން ދަރިފުޅަށް އެޗް.އައި.ވީ އަދި ސިފިލިސް ފެތުރުން ނައްތާލުމަކީ އާންމު ސިއްހަތުގެ ދާއިރާއިން ޑެންމާކުން ހޯދި ވަރަށް ބޮޑު ތާރީޚީ ކާމިޔާބީއެކެވެ.
”މި ހާސިލުކުރެވުނު ލަނޑުދަނޑިން ހާމަވެގެންދަނީ ދުނިޔޭގެ ގައުމުތަކުން ސިޔާސީ ކަންކަމަށް ކުރާ ހޭދަ ކުޑަކޮށް އަސާސީ ސިއްހީ ހިދުމަތްތަކަށާއި، މައިންނާއި ކުޑަކުދިންގެ ސިއްހަތަށް އިސްކަންދީގެން އިންވެސްޓްކޮށްފިނަމަ، ކޮންމެ މާބަނޑު އަންހެނަކާއި ތުއްތު ކުއްޖަކު މިފަދަ ބަލިތަކުން ރައްކާތެރިކުރެވިދާނެކަން،“ ޑރ. ޓެޑްރޯސް އިތުރަށް ވިދާޅުވިއެވެ.
އެޗް.އައި.ވީ އާއި ސިފިލިސްގެ ނިސްބަތް
ދުނިޔޭގެ ސިއްހަތު ޖަމްއިއްޔާ އިން މައިމީހާގެ ފަރާތުން ދަރިފުޅަށް އެޗް.އައި.ވީ ފެތުރުން ހުއްޓުވުން ނުވަތަ އެލިމިނޭޓް ކުރުން ކަމަށް ބަލަނީ، މާބަނޑު ކޮންމެ 100 އަންހެނެއްގެ ތެރެއިން މަދުވެގެން 95 މީހުން ޓެސްޓުކޮށް ފަރުވާ ދިނުމާއިއެކު އަލަށް އުފަންވާ ކޮންމެ އެއްލައްކަ ކުދިންގެ ތެރެއިން ބަލިޖެހޭ ކުދިންގެ އަދަދު 50 އަށްވުރެ ދަށުގައި ދެމެހެއްޓުމަށެވެ.
ޑެންމާކުގައި ގާތްގަނޑަކަށް ހަހާސް މީހުން އެޗް.އައި.ވީ އާއެކު ދިރިއުޅެމުންދާއިރު، މާބަނޑު އަންހެނުންގެ ތެރެއިން މި ބަލި ޖެހިފައިވާ މީހުންގެ ނިސްބަތަކީ 0.1 އިންސައްތައަށްވުރެ ވެސް ކުޑަ މިންވަރެކެވެ.
2024 ވަނަ އަހަރު އެ ގައުމުގައި ސިފިލިސް ބަލީގެ ޖުމްލަ 626 ކޭސް ރިޕޯޓްކޮށްފައިވާއިރު، މީގެ ތެރެއިން 500 އަށްވުރެ ގިނަ ކޭސްތަކުގަ ހިމެނެނީ ފިރިހެނުންނެވެ.
ޑަބްލިއު.އެޗް.އޯގެ ޔޫރަޕް ސަރަހައްދުގެ ރީޖަނަލް ޑައިރެކްޓަރު ޑރ. ހޭންސް ހެންރީ ޕީ. ކްލޫގަ ވިދާޅުވި ގޮތުގައި، ޑެންމާކުން މި ލަނޑުދަނޑިތައް ހާސިލްކޮށްފައިވަނީ މާބަނޑު ދުވަސްވަރުގެ ސިއްހީ ފަރުވާއާއި، އިތުބާރު ހުރި މަޢުލޫމާތު ބަލަހައްޓާ ނިޒާމުތަކުގެ އިތުރުން އަންހެނުންގެ ހައްގުތަކަށް އިހުތިރާމު ކުރުމުގެ ސަބަބުންނެވެ.
މީގެ އިތުރުން، ހެޕަޓައިޓިސް ބީ ހިމެނޭހެން މި ތިން ބަލި އެއްކޮށް ނައްތާލުމަށް (ޓްރިޕަލް އެލިމިނޭޝަން) ޑެންމާކުން ކުރަމުންދާ މަސައްކަތުގައި އެ ޖަމްއިއްޔާގެ ފުރިހަމަ އެހީތެރިކަން އެއްބާރުލުން ދޭނެ ކަމަށްވެސް އޭނާ ވިދާޅުވިއެވެ.
ގުޅުންހުރި