ފުރަތަމަ 15 ދުވަހު ފިތުރު ޒަކާތުގެ ގޮތުގައި 5.5 މިލިއަން ރުފިޔާ

މި އަހަރުގެ ރޯދަ މަހުގެ ފުރަތަމަ 15 ދުވަހު ފިތުރު ޒަކާތުގެ ގޮތުގައި 5.5 މިލިއަން ރުފިޔާ ލިބިފައިވާ ކަމަށް ދިވެހިރާއްޖޭގެ ޒަކާތް ހައުސް އިން ބުނެފި އެވެ.

ޒަކާތް ހައުސް އިން މިއަދު އާންމުކޮށްފައިވާ ތަފާސްހިސާބުތައް ދައްކާ ގޮތުން، މި އަހަރުގެ ރޯދަމަހުގެ ފުރަތަމަ 15 ދުވަހު ޒަކާތުގެ ގޮތުގައި 5،482،171 މިލިއަން ރުފިޔާ ލިބިފައިވެ އެވެ. އެއީ މިދިޔަ އަހަރުގެ ރޯދަ މަހުގެ މި މުއްދަތުގައި ފިތުރު ޒަކާތުގެ ގޮތުގައި ލިބުނު އަދަދަށްވުރެ އެއް މިލިއަން ރުފިޔާ އިތުރު އަދަދެކެވެ.

އެގޮތުން މިދިޔަ އަހަރުގެ ރޯދަމަހުގެ ފުރަތަމަ 15 ދުވަހު ފިތުރު ޒަކާތުގެ ގޮތުގައި ލިބުނީ 4.4 މިލިއަން ރުފިޔާ އެވެ.

މިދިޔަ 4 އަހަރުގެ ރޯދަމަހުގެ ފުރަތަމަ 15 ދުވަހުގެ ތަފާސްހިސާބު:

• 2026: 5.5 މިލިއަން ރުފިޔާ
• 2025: 4.4 މިލިއަން ރުފިޔާ
• 2024: 2.6 މިލިއަން ރުފިޔާ
• 2023: 2.8 މިލިއަން ރުފިޔާ

ޒަކާތް ހައުސްގެ ފަރާތުން މި ރޯދަމަހުގެ ފުރަތަމަ ދުވަހުން ފެށިގެން ވަނީ އޮންލައިންކޮށް ފިތުރު ޒަކާތް ބަލައިގަންނަން ފަށައިފަ އެވެ. އެގޮތުން ޖުމުލަ ހަތް އޮންލައިން ޕްލެޓްފޯމަކުން މި އަހަރުގެ ފިތުރު ޒަކާތް ދެއްކޭނެ އިންތިޒާމު ވަނީ ހަމަޖައްސައިފަ އެވެ.

މި ފަހަރު އޮންލައިންކޮށް ފިޠުރު ޒަކާތް ދެއްކޭނެ 7 ޕްލެޓްފޯމަކީ:

• ދިރާގު މޯބައިލް އެޕްއާއި ދިރާގު ޕޭ ވެބްސައިޓް
• އުރީދޫ، އެމް ފައިސާ މޯބައިލް އެޕް
• މޯލްޑިވްސް އިސްލާމިކް ބޭންކުގެ މޯބައިލް އެޕް
• ބޭންކް އޮފް މޯލްޑިވްސްގެ މޯބައިލް އެޕް
• ފަހިޕޭ މޯބައިލް އެޕް
• އަވަސް މޯބައިލް އެޕް
• ބަނޑޭރި ޕޭ ވެބްސައިޓް

މީގެ ތެރެއިން ބަނޑޭރި ޕޭ އާއި ފަހިޕޭ މެދުވެރިކޮށް ރޯދަމަހުގެ އެންމެ ފަހު ދުވަހާ ހަމައަށް ވެސް ފިތުރު ޒަކާތް ދެއްކޭނެ އެވެ. އެހެން ޕްލެޓްފޯމުތައް މެދުވެރިކޮށް ފިތުރު ޒަކާތް ދެއްކޭނީ ރޯދަމަހުގެ 27 ވަނަ ދުވަހުގެ ހެނދުނު 06:00 އާ ހަމައަށެވެ.

މި ރޯދަމަހު ފިތުރު ޒަކާތުގެ ގޮތުގައި ދައްކަންޖެހޭ ފައިސާގެ އަދަދުތައް:

• އާދައިގެ ހަނޑޫ: 12 ރުފިޔާ
• ތައިލެންޑް ހުދު ހަނޑޫ: 53 ރުފިޔާ
• ރަތް ހަނޑޫ: 96 ރުފިޔާ
• ބާސްމަތީ ހަނޑޫ (އާދައިގެ): 77 ރުފިޔާ
• ބާސްމަތީ ހަނޑޫ (މޮޅު): 109 ރުފިޔާ
• ބާސްމަތީ ހަނޑޫ (އެންމެ މޮޅު): 136 ރުފިޔާ
• އާދައިގެ ފުށް: 10 ރުފިޔާ
• އާޓާ ފުށް: 75 ރުފިޔާ