އެޗްޑީސީގެ ނަމާއި ލޯގޯ އަލުން ބޭނުންކުރަން ފަށައިފި

ހައުސިން ޑިވެލޮޕްމެންޓް ކޯޕަރޭޝަން، އެޗްޑީސީގެ ނަމާއި ލޯގޯ އަލުން ބޭނުންކުރަން ފަށައިފިއެވެ.

މިދިޔަ އަހަރުގެ އޭޕްރިލް މަހު އެ ކުންފުނި ”އަރބަންކޯ“ އަށް ރީބްރޭންޑްކުރި ނަމަވެސް، އެނަމުގައި ޤާނޫނީ ޙައިސިއްޔަތު ހޯދަން މަސައްކަތްކޮށްފައެއް ނުވެއެވެ.

އެޗްޑީސީގެ ނަމާއި ލޯގޯ އަލުން ބޭނުންކުރަން ފެށުން ފާހަގަކުރުމަށް، އެކުންފުނިން ވަނީ ޚާއްސަ ރަސްމިއްޔާތެއްވެސް ބާއްވާފައެވެ. އަދި ކުންފުނީގެ މައި ނަން ބޯޑު ”އަރބަންކޯ“އިން ”އެޗްޑީސީ“ގެ ނަމަށް ވަނީ ބަދަލުކޮށްފައެވެ.

މިރަސްމިއްޔާތުގައި ވާހަކަދައްވަމުން ކުންފުނީގެ މެނޭޖިން ޑިރެކްޓަރ ފަޒުލް ރަޝީދު ވިދާޅުވީ މިގޮތަށް ބަދަލުކުރަން ނިންމީ، އެޗްޑީސީގެ ގޮތުގައި ރައްޔިތުންނަށް ޚިދުމަތް ދިނުމަށްކަމަށެވެ. އެޗްޑީސީގެ ޢަމާޒަކީ ރައްޔިތުންނަށް ދޭ ޚިދުމަތްތައް ފުޅާކޮށް، ފަސޭހައިން ލިބޭނެ އިންތިޒާމްތައް ހަމަޖެއްސުންކަމަށްވެސް ފަޒުލް ވިދާޅުވިއެވެ.