ގަވާއިދާ ހިލާފަށް އުޅެމުންދިޔަ 1،800 ބިދޭސީން ފޮނުވާލައިފިން: އިހުސާން

ގަވާއިދާ ހިލާފަށް ރާއްޖޭގައި އުޅެމުންދިޔަ 1،800 ބިދޭސީން، އަނބުރާ ފޮނުވާލާފައިވާ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.

ދެކުނުގެ ހަތަރު އަތޮޅަށް ރައީސް މިއަދު ފެއްޓެވި ދަތުރުފުޅުގައި މިރޭ ފޭދޫގައި ބޭއްވި ޖަލްސާގައި ވާހަކަ ދައްކަވަމުން އިހުސާން ވިދާޅުވީ ގަވާއިދާ ހިލާފަށް އުޅެމުންދާ ބިދޭސީންގެ މައްސަަލަ ހައްލުކުރުމަކީ ރައީސް ޑރ. މުހައްމަދު މުއިއްޒު ހާއްސަ އިސްކަމެއް ދެއްވާ ކަމެއް ކަމަށެވެ.

އެގޮތުން އެ މައްސަލަ ހައްލުކުރަން އެ މަނިކުފާނުގެ އިސްނެންގެވުމުގެ މަތިން ޓާސްކް ފޯސެއް އެކުލަވާލައިގެން މަސައްކަތް ކުރަމުން އަންނަ ކަމަށް ވިދާޅުވި އެވެ.

”ސީދާ ރައީސްގެ ބެއްލެއްވުމުގެ ދަށުން އަޅުގަނޑުމެން ޓާސްކް ފޯހެއް ނަގައި މަސައްކަތުގެ އަލީގައި މިހާރު ވާނީ ރާއްޖޭގައި ގަވާއިދާ ހިލާފަށް އުޅެމުންދިޔަ 1،800 އަށްވުރެ ގިނަ މީހުން، އޭގެ ތެރޭގައި އަމިއްލައަށް ދިޔަ މީހުންނާއި އަޅުގަނޑުމެން ފޯސްފުލީ ރާއްޖެއިން ޑިޕޯޓްކޮށްލި މީހުން ހިމެނޭހެން ރާއްޖެއިން ބޭރުކުރެވިފަ. މިއީ އަޅުގަނޑުމެން ދާން ބޭނުންވާ ސްޕީޑަކީ،“ އިހުސާން ވިދާޅުވި އެވެ.