ރައްޔިތުންގެ ހިޔާލާއި ޝަކުވާ ފޮނުވަން ހާއްސަ ޕޯޓަލްއެއް ލޯންޗުކޮށްފި، ޖަވާބު ދެއްވާނީ ސީދާ ރައީސް

ރައީސް ޑރ. މުހައްމަދު މުއިއްޒަށް ރައްޔިތުންގެ ހިޔާލާއި ޝަކުވާ ފޮނުވޭނެ ހާއްސަ ޕޯޓަލްއެއް އިފުތިތާހުކޮށްފި އެވެ.

މި މަހުގެ ފަސްވަނަ ދުވަހު، ރައްޔިތުންގެ މަޖިލީހަށް އެ މަނިކުފާނުގެ ފުރަތަމަ ރިޔާސީ ބަޔާން އިއްވަވަމުން ރައީސް ވަނީ ރައީސް އޮފީހުގެ ތެރެއިން އެފަދަ ޕޯޓަލްއެއް ހައްދަވާނެ ކަމަށް ވިދާޅުވެފަ އެވެ.

’ރައްޔިތުންގެ އަޑު’ގެ ނަމުގައި ހަދާފައިވާ އެ ޕޯޓަލް ރައީސް މުއިއްޒު އިފުތިތާހު ކޮށްދެއްވީ އާންމުންގެ ސުވާލުތަކަށް ސީދާ އެ މަނިކުފާނު ޖަވާބު ދެއްވުމަށް މިރޭ ސަލްޓަން ޕާކުގައި ބޭއްވި ފޯރަމުގެ ތެރެއިންނެވެ.

އެ ޕޯޓަލްގެ ވެބް އެޑްރެހަކީ citizensvoice.gov.mv އެވެ. އެ ޕޯޓަލްއަށް ލޮގިން ވާންޖެހެނީ އީފާސް މެދުވެރިކޮށެވެ.

ރައީސް އޮފީހުން ބުނީ، އެ ޕޯޓަލްއަކީ ރައްޔިތުންގެ އަޑު އަހައިގެން، ރައްޔިތުންނާ ވީހާވެސް ގާތުން މަސައްކަތް ކުރެއްވުމަށް ރައީސް މުއިއްޒު ގެންގުޅުއްވާ ސިޔާސަތުގެ މުހިންމު ފިޔަވަޅެއް ކަމަށެވެ. އަދި ރައްޔިތުން ބޭނުންވާ ކަންކަން ރައްޔިތުންގެ ފަރާތުން އޮޅުންފިލުވައިގެން، ރައްޔިތުން އެދޭ ގޮތަށް މަސައްކަތް ކުރެއްވުމަކީ ރައީސް ބޭނުންފުޅުވާ ގޮތް ކަމަށްވެސް ބުންޏެވެ.